goiena.eus

Arrasatearrek ere gaitzetsi dute Gasteizeko hilketa bikoitza

  Gizartea  Arrasate

Eraso matxistarik ez, erantzunik gabe lelopean batu dira herritarrak Herriko Plazan. Ordu erdi egon dira han, isilik, aurreko egubakoitzean, labankadaz eraildako bi emakumeen heriotza salatzeko. Herritarrekin batera, Udalean ordezkatuta dauden alderdietako kideak egon ziren. Besteak beste, Maria Ubarretxena eta Eneko Barberena.

Arrasateko Emakumeen Mundu Martxako plataformak deitutako elkarretaratzean herritar dezente batu da. "Eraso berri hau bizi garen sistema kapitalista patriarkalaren ondorio zuzena da, non indarkeria sexista eredu honek sortzen dituen pertsonen arteko botere harremanak mantentzeko erabiltzen duen baliabidea izanik", esan dute prentsa-ohar bidez.

Indarkeria matxista "guztion" arazoa dela gaineratu dute: "Nazkatuak gaude erasotuak eta erailak izateaz! Indarkeria sexistari aurre egiteko lehen maila arazo politikotzat hartua izan dadin eskatzen dugu. Egungo jarrera konplizeak alboratu eta bizi garen jendarte antolaketa sexistari aurre egiteko benetako neurriak behingoz har daitezela exijitzen dugu".

Udal Gobernuaren gaitsezpena

Gasteizeko hilketa bikoitzaren aurreran, Udalean ordezkatuta dauden alderdi politikoek adierazpen bateratua egin dute. "Arrasateko Udalak irmoki gaitzesten ditu  erailketak eta emakumeen aurkako edozein eraso eta era berean herritar guztiei eskatu nahi die salatu ditzatela emakumeen kontrako eraso guztiak".

Beste herrietan 

Hilketak gertatu ziren unetik asko izan dira egindako ekintzak eta elkarretaratzeak. Bailaran beste hainbat egin dira: Aretxabaletan, Eskoriatzan, Bergaran eta Oñatin ere kalera irten dira.

Espetxean 

Bestalde, atzo arratsaldean sartu zuten Langraitzeko espetxean bere emazte ohia eta haren ama hiltzeaz  akusatuta dagoen arrasatearra. Txagorritxu ospitalean alta jaso ostean, epailearen aurrean deklaratu zuen. Ostean, kartzelara eraman zuten.

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa