Azken hilabeteotan ehunka erretiratuk eta pentsiodunek euren eskubideak eta bereziki pentsio duinak aldarrikatzeko agerraldiak egin dituzte, eta arrasatearrek ere bat egin dute horiekin. Hala, joan den martxoaren 6an udalbatzak egindako osoko bilkuran hartu zuten parte. Udalbatzak aho batez onartu zuen pentsioen gaineko mozioa, eta gainera, Gipuzkoako Erretiratu eta Pentsiodunen Elkarteak aurkeztutako eskariak Espainiako gobernura eta Enplegu eta Gizarte Segurantzako ministeriora helarazteko konpromisoa hartu zuen. "Ildo horretatik, emandako hitza beteaz, dagoeneko igorri dizkio Udalak aipatutako erakundeei elkartearen eskariak, guztiak osoko bilkuran babestu eta onartuak, gainera. Horien artean pentsioen ordaina urteko KPIaren arabera handitzea, alarguntza pentsioak igotzea eta LPEZaren baliogabetzea eta itzulketa erreklamatu dituzte pentsiodunek eta Arrasateko Udalak".
Eskaera horien guztien bitartez, pentsioen egoera "larri bezain kezkagarria" salatu dute, eta egungo egoerari irtenbidea emateko helburuz, "pentsioak berehala lehengoratzea exijitu" diote gobernuari eta Enplegu zein Gizarte Segurantzako ministerioari.
Udalak, era berean, "laguntza, babesa eta elkartasuna" adierazi die pentsiodun eta erretiratu guztiei eta haien "eskubideen eta interesen alde lanean" jarraituko duela adierazi du.