Amaia Apalauzak eta Iñigo Roquek batera aurkeztutako proiektuak irabazi du Jokin Zaitegi lehiaketa

Amaia Apalauza eta Iñigo Roque. Argazkiak: Elearazi eta Anboto.

Literaturako Nobel saridunak euskaratzeko AEDk eta Elkar-ek, Arrasateko Udalaren eta Laboral Kutxaren laguntzarekin, antolatutako Jokin Zaitegi itzulpen-lehiaketa Amaia Apalauzak eta Iñigo Roquek batera aurkeztutako proiektuak irabazi du. Kazuo Ishiguro idazlearen The Remains of the Day euskaratuko dute.

Asun Garikanok, Xabier Olarrak eta Xabi Payak osaturiko epaimahaiak hautatu du Apalauzaren eta Roqueren lana. Kazuo Ishiguro nobelagile japoniar-britainiarraren The Remains of the Day euskaratu beharko dute itzultzaileek, eta 2018 urte amaieran emango du argitara Elkar argitaletxeak; iazko urte amaieran Suediako Akademiak Nobel saridun hautatu zuen Ishiguro.

2002tik abian den lehiaketa

2002an abiarazi zuten Elkar-ek eta AEDk Nobel sariduna euskaratzeko Jokin Zaitegi beka, eta hamaika urtez hauexek izan ziren sari horri esker itzulitako liburuak:

  • 2002 Imre Kertesz: Zoririk ez Itzultzailea: Urtzi Urrutikoetxea
  • 2003 J.M. Coetzee: Lotsaizuna Itzultzailea: Oskar Arana
  • 2004 Elfriede Jelinek Itzulpen saria hutsik utzi zen
  • 2005 Harold Pinter: Maitalea eta beste antzerki-lan batzuk Itzultzailea: Iñigo Errasti
  • 2006 Orhan Pamuk: Elurra Itzultzailea: Monika Etxebarria / Fernando Rey
  • 2007 Doris Lessing: Belarra kantari Itzultzailea: Koro Navarro
  • 2008 J.M.G. Le Clézio: Basamortua Itzultzailea: Luis Berrizbeitia
  • 2009 Herta Müller: Hatsaren kulunka Itzultzailea: Ibon Uribarri
  • 2010 Mario Vargas Llosa: Pantaleon eta bisitariak Itzultzailea: Santi Leoné
  • 2011 Tomas Tranströmer: Bizientzat eta hilentzat Itzultzailea: Juan Mari Aguirreurreta
  • 2012 Mo Yan: Hori da umorea, maisu! Itzultzaileak: Maialen Marin / Aiora Jaka
  • 2013-2014 Zaitegi Saria ezin izan zen antolatu
  • 2015 Svetlana Aleksievitx: Gerrak ez du emakume aurpegirik Itzultzailea: Iker Santxo Insausti
  • 2016 Bob Dylan: Ehun kanta (oraindik argitaratu gabe) Itzultzailea: Gartxot Unsain

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.