Domekan izango da Euskararen Nazioarteko Eguna eta Arrasateko Euskalgintza martxan da eguaztena ezkero. Izan ere, hainbat ekintza egin dituzte astean zehar, eta asteburura begira egitarau zabala dute prest.
Eguaztenean hasita, mural kolektibo bat ari dira margotzen, Txatxilipurdi Elkartearen garaje handian. 14:30etik 18:00etarako tartean, arratsaldero, eragile desberdinetako kideak elkartu dira, elkarrekin horma-irudi eder bat osatzeko, eta gaur –egubakoitza–bukatuko dute murala, ordu berean.
Bestalde, gaur hainbat ikastetxetan ekintza bereziak egingo dituzte; adibidez, Euskararen Egunerako kaxaz osatutako horma-irudiak. Euskaltegietan ere ari dira ospatzen. Izan ere, udal euskaltegian mintzodromoa eta txokolate-jana egin zuten atzo, eta AEK-ko euskaltegian Euskara gehiago egiteko zer egin geike esaldiak-konpromisoak landuko dira klaseetan, eta gero, txapak egingo dituzte, horiek aldarrikatzeko. Bestalde, ludoteketan altxorraren bila ibiliko dira herriko kaleetan zehar eta txokolate beroa hartuaz amaituko dute eguna.
Asteburuari begira, esan bezala, hainbat ekintza egongo dira. Biharko, zapatua, gazte txokoetako nerabeek arratsalde osorako egitaraua prestatu dute –Urban Festa!–. Domekan, Euskararen Nazioarteko Eguna ospatzeko hainbat ekintza egongo dira goizean zehar, eta, bukatzeko, Euskararen plaza inauguratuko dute. Hain zuzen, Udaltzaingo, Txatxilipurdi eta Ereindajan parean dagoen parkea izango da Euskararen plaza aurrerantzean.
Geike
Hamabi elkartek osatzen dute Arrasateko Euskalgintza: Ekin, Emun, AED, Goiena, Euskal Herrian Euskaraz, Txatxilipurdi, Arrasate Institutua, AEK, Arizmendi Ikastola, MU, Herri Eskola eta Arrasateko Udalak.
2011n sortu zuten euskararen aldeko bilgune hori, herriko euskara taldeen, ikastetxeen eta Udalaren eskutik. Iaz, bosgarren urteurrena aprobetxatuz, ebaluazioa egin zuten, eta hainbat ondorio atera zituzten.
Hausnarketa berri honetan, Arrasate euskaldunagoa lortzeko, bilgune dinamikoa, irekia, eraikitzailea, freskoa, ausarta, herrikoia, aktiboa eta sortzailea izatea da helburua, eta, hori lortzeko helburuarekin, izen berria jarri diote Arrasateko Euskalgintzari: Geike bilgunea.
Euskaraldia ere badator, eta, 2018ra begira, Geike bilguneak buru-belarri helduko dio ekimen horri. Hori dela eta, herritarrei ekimenetan parte hartzeko gonbita egin diete, ekimenak proposatuz, antolaketan parte hartuz eta egunerokotasunean Geike osatzen duten euskalgintzako ordezkariak irudi berriarekin.
