2018ko aurrekontu proiektuan 40.000 daude aurreikusita Ekoboulevard egitasmoa diseinatzeko; oinezkoei eta bizikletadunei lehentasuna emateko asmoz diseinatu nahi den proiekturako, alegia.
Argi utzi behar da egitasmo bat dela, oraindik puntuz puntu zehazteke eta definitzeke dagoela, eta, ziurrenik, ez dela legealdi honetan martxan jarriko. "Lanak hasi aurretik TAO sisteman indarrean egon beharko litzateke, beraz, lanak ez liratezke 2019ko hauteskundeak baino lehen hasiko" adierazi du Ibon Arrupe Hirigintza, Ingurumen eta Mugikortasun zinegotziak.
"Aurrez egindako Etxaluze-Musakola bidegorri proiektuaren barruan txertatzen da, eta datozen hamar urteetarako Mugikortasun Planaren barruan dago sartuta", azaldu du Arrupek.
Aldaketak Grupo San Juanen
Bidegorria eta erreka ditu ardatz proiektuak, baina aldaketa nabariak ekarriko lituzke Grupo San Juan aldean. Alfontso X Jakintsua plazan zirkulazioa ezabatzea planteatzen da, eta hango aparkalekuak kendu.
Horrez gain, Grupo San Juango beste bi aparkalekuak, Iparragirre plazakoak eta Jose Maria Egurengoak, auzoko egoiliarrentzat izatea aurreikusten da.
"Aparkalekuekin planteatzen den aldaketa Mugikortasun Planean aurreikusten den TAO sistemaren barnean dago sartuta. Auzoko kideek aparkatzeko zailtasunak dituzte aspalditik. Hori konpontzea eta oinezkoentzako espazioak irabaztea da lortu nahi dena".
Bidegorri sarea
Proiektu horren bidez San Andres eta Zigorrola auzoak lotuko dituen bidegorri sarea ezarriko litzateke, herria Oñatirekin, Bergararekin eta Aretxabaletarekin lotuko lukeena. "Etxaluzetik Garibairainoko zatia Kontzezino kaleko errepide albotik egingo luke bidegorriak, ziurrenik, Kontzezinoko espaloiaren eta errepidearen artean", azaldu du Arrupek.
"Garibain, bidegorria Iturbide egoitzaren aldean dagoen autobus geltokitik joango litzateke. Maalarainoko zatia, aldiz, egun autobus eta taxientzat mugatuta dagoen tokitik egingo luke, zati hori oinezkoentzako eta bizikletentzako mugatuz". Maalatik Zigorrolaraino Gipuzkoa etorbidetik jarraituko luke bidegorriak, kale horretan dagoen Udal Biltegiraino.
Garibaiko zatia oinezkoentzat
Gaur egun garraio publikoei mugatuta dagoen irudiko zatia oinezkoentzat eta bizikletentzat izatea planteatzen da. Horrez gain, Garibaiko zirkulazioa noranzko bakarrekoa izango litzateke. Autobusak Kontzezinotik sartu eta Biterira joango lirateke, noranzko bakarrean.
Biteriren estatuaren aldaketa
Pedro Biteri izan da Arrasatek izan duen ongile ospetsuenetakoa, eta haren omenezko estatua bat dago Grupo San Juanen, Alfontso X Jakintsua plaza erdian. Arrasate Zientzia Elkartekoen iritziz, Biteriren omenezko estatua ez dago leku aproposean, eta haren izena duen Biteri kalean kokatzeko eskaera egin dute, Zaldibarrera heltzen dagoen belardian, hain zuzen.
"Egun dagoen tokian ez da apenas ikusten. Leku irekiagoan jartzea nahiko genuke, jende guztiak ikusteko moduan. Arrasateko ongile handiena izan zen, hark finantzatu zituen Zaldibarko frontoia, Biteri Eskolak, Merkatu Plaza eta Garibai etxea bera, eta leku duinagoa merezi duela uste dugu".
Erreka alboan jendearendako lekuak
Maalako biribilgunetik Zaldibarrerantz doan erreka zatian ere izango du eragina Ekoboulevard-ek. San Bixente Ferrer eta Mapfre ondoko errepideak oinezkoentzat izatea planteatzen du, erreka alboko pareta kenduta, jendea egoteko espazioak egokituta.
