Erdi Aroko biztanleen hondakinak eskuratzeko ikerketa aurrera doa

Mirari Altube Arrese 2017ko ira. 14a, 15:48
Indusketa-lanak parrokia inguruan.

Arrasate Zientzia Elkarteak sustatu du San Juan parrokian egiten dabiltzan Erdi Aroko populazioaren jatorriaren inguruko ikerketa arkeologikoa hiribilduaren hirigune historikoan. Horren helburua da giza hondakinak eskuratzea, eta ondoren, metodologia aurreratuen bidez ikertzea, eta ehorzteen inguruko testuinguruak aztertzea. Ikerketa hori zuzenduko dute Aranzadi zientzia elkarteak eta AZE-k.

Parrokia inguruan indusketa-lanak egiten dabiltza Aranzadi Zientzia Elkarteko arkeologo eta antropologo talde bat ikerketan lagun dezaketen hondakinak eta datuak eskuratzeko. 

Zenbait mendetako hilerria

AZE-ren esanetan 1318. urtekoa da San Juan Bataiatzaileari buruzko lehen aipu idatzia: "Hiribilduan 1448an izandako suteak ondorioak utzi zizkion. Ondoren, orain ezagutzen dugun moduan berreraiki zuten. Kokalekua 1520 eta 1540 urteen artean eraikitako kanpandorrea, orain duguna, dagoen orubean dago. Tenpluaren barnealdea zein inguruak okupatuak izan ziren eta hilerri gisa erabili zituzten zenbait mendetan, harik eta 1811n, Aldaira eraman zuten arte".

Eta gaineratu dute: "XIX. mendean, tenpluaren inguruko zoladura galtzada-harrizkoa zen eta XX. mendearen hasieran asfaltoz estali zuten. Bi zolak 1991n kendu zituzten. 1991n sakoneko eraberritzea egin zioten elizari, bai kanpotik, bai barrutik, eta hortik dator gaur egungo itxura. Aipatutako lan horietan, gainazaleko hezur-hondakin ugari atera zituzten, baina kanpandorrearen azpiko eremuan hobiratzeak azaldu ziren: harrizko hilobi bat eta ostilamendu-hondakinak".

Ikerlanaren babesle dira Arrasateko Udala eta Gipuzkoako Foru Aldundiko Kultura Departamentua, eta Euskal Herriko Unibertsitatea ere kolaboratzailea da. Proiektuak aste batzuk iraungo dutela iragarri dute eta bukatzerakoan emango dituzte argibideak.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak