Txiki Festa: guraso eta haurrak elkartzeko gunea

Imanol Gallego 2017ko api. 30a, 09:37

Arrasateko Gaztetxeko Guraso eta Haur Asanbladako kideek, herrian haurrentzat aukera gutxi dagoela ikusirik, Gaztetxea jolasleku bihurtzea erabaki zuten atzo. Ohiko kontzertuak ipuin kontaketa bihurtu ziren, eta taberna, haur zein gurasoek mokadutxoa egiteko gune.

Zapatuan Gaztetxea inoiz baino gazteagoa izan zen, garai bateko nerabeek, euren seme-alabak eroan baitzituzten bertara. Herrian umeak ez ezik, gurasoak ere txikiekin egoteko toki falta igarri ostean, jo zuten Gaztetxera eta AGAKOko kideei proposamena helarazi bezain pronto hauek baiezko borobil batekin ireki zizkieten ateak. Asanbladako kide Naiara Corcuerak, ekimenak izandako babesa eskertu gura izan zuen, "hasieratik ilusionatu ziren Gaztetxea haurrei zabaltzeko asmoarekin, eta erraztasun ugari eman dizkigute".

Gaztetxea jolasleku

Etxeko txikiek espazioa ezagutu ez arren, berehala egin ziren Gaztetxera. Batzuek baloiarekin oholtza gainean jolasten zuten bitartean, besteek gurasoek prestatutako meriendaz gozatzen zuten. Lehen kontaktuaren ostean, Txatxilipurdiko bi hezitzaileren eskutik ipuin bat entzuteko garaia iritsi zen. Ostean, batzuek istorioko pertsonaiak margotzen zituzten bitartean, besteek jolas egiteko aprobetxatu zuten.

Egia da hasieran txikiek baino ez zutela jolasten, baina minutuak pasa ahala, gurasoak ere animatu ziren haurrekin jolastera. 

Jarraitzeko asmoa

Abendu aldean egin zuen asanbladak lehen batzarra, eta urtarrilean hasi ziren Gaztetxea erabiltzen. Lehen hilabete hauetan haurren loari buruzko hitzaldia eta zapatuko Txiki Festa antolatu dute, baina aurrerantzean, gauza gehiago egiteko asmoa dute. Egun 25 familia inguruk osatzen dute taldea, eta haurrentzako gauzak antolatzeko gogoa duen edonor izan daiteke bertako partaide.

 

 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak