Baleike: "Aurrekontu parte hartzaileak ahalbidetzeko metodologia zehatzak planteatuko ditugu"

Baleike udal taldeko zinegotzi Igor Urizar eta Eva Abuin, aurreko osoko bilkura baten.

Azaroaren 25ean amaitu zen Udal Gobernuaren 2017rako aurrekontu proiektuari emendakinak aurkezteko epea. Oposizioko bigarren alderdiak, Baleike udal taldeak, herritarren partaidetza ahalbidetzeko mekanismoak behar direla adierazi du, besteak beste.

-Ze lanketa egin du Baleikek aurrekontuen aurrean?

Gure helburua beti ere partaidetza sustatzea da eta ildo horretan, aurrekontuak hausnartu, baloratu eta zirkuluaren baitan jartzen ditugu, denon artean erabakiak hartzeko. Proposamenak garatu eta gure artean bilduz hartuko ditugu jarraitu beharreko bideak. Eragile batzuekin ere biltzen gabiltza, horien eskakizunei forma ematen saiatzen gara aurrekontuetan isla izan dezaten.

-Udal gobernuak 2017rako zehaztu duen aurrekontu proposamenaren aurrean ze iritzi dauka Baleikek?

Arrasateko Gobernu Taldeak, orain arte izan diren udal gobernu guztiak bezala, prozesu itxiak erabili dituzte aurrekontuak lantzeko orduan, beste udalerrietan zabaltzen ari diren eredu parte-hartzaileei muzin eginez. Adibideak zabaltzen ari dira beste hainbat lekuetan, herriko bizilagunen eskuetan erremintak jarrita, guztiok ordaintzen ditugun zergak zein proiektutan inbertitu behar diren herritarren artean erabakitzeko. Baleikeren partaidetzarekiko konpromisoan jarraituz, aurrekontu parte hartzaileak ahalbidetzeko emendakin bat aurkeztuko dugu, metodologia zehatzak planteatuz. Mahai informatzaileak jarriko ditugu kaleetan kudeatzeko eredu berri bat posible dela erakutsiz, 2018ko aurrekontuak partehartzaileak izan daitezen, egun Barakaldo, Irun edo Gasteizen gertatzen den bezala.

-Ze beste emendakin aurkeztu duzue?

Zehaztapenak egiten dihardugu, azkeneko erabakiak hartu aurretik. Gure emendakinak instituzio eredu berri baten alde pentsatzen bideratu ditugu. Ausardiaz ekin behar diogu borondate honi, herdoildurik dagoen udal eredu hau hiritarren artean are eta gehiago zabaltzen ari diren grina eta eskaera berrietara egokituz. 
 
Enplegua gure lehentasunetako bat da, bide asko dago egiteko, gaur egun burutzen ari diren planak ez direlako eraginkorrak. Langabezia tasak %14an jarraitzen du, eskualdeko altuena, eta urte eta erdi igarota, bistan da gobernuaren politikek ez dutela ezer aldatu.
 
Berdintasun alorrean ere udal politika publikoak genero ikuspegitik ikuskatzea garrantzitsua dela deritzogu, eraiki nahi dugun gizartea justua izan dadin guztiontzat.
 
Partaidetzaren gainean, parte hartze batzorde baten eraketa proposatzen dugu, beharrezkoa delako herrian ematen diren prozesu ezberdinak koordinatzeko, irizpideak bateratuz, metodologiak eta erremintak garatuz gero eta botere gehiago herritarren eskuetan ezarriz.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.