Arrasateko garbiketa ordenantza, indarrean

Altsasuko atxiloketak salatzeko pintada Seber Altube plazan.

Gaur, abenduak 1, jarri da indarrean garbiketaren arautegia Arrasaten. Agintaldiko orain arteko gairik eztabaidatuena izan da; gobernuak dio herri txukunago baterako erreminta izango dela eta oposizioak, berriz, adierazpen askatasuna urratzen duela.

Martxoaren 22ko osoko bilkuran behin-behineko onarpena eman  eta uztailaren 12ko osoko bilkuran behin betiko izaeraz onartu ostean, hurrengo eguenean, abenduak 1, jarriko da indarrean kale garbiketa ordenantza. Udal Gobernuaren orain arteko erabakirik polemikoenetakoa izan da, oposizioko alderdi politiko guztiak eta herriko hainbat eragile kontra jarri dituena.

Ordenantzako 17. artikuluak –kartelak, pankartak, pintadak eta muralak arautzen ditu artikulu horrek, besteak beste– hautsak harrotu ditu; kontrakoek, artikulu horrek adierazpen askatasuna urratzen duela uste dute.

Gobernuaren arabera, herri txukunago eta erakargarriago baterako erreminta izango da ordenantza berria.     

Zigorren aurretik, "pedagogia"

Zer suposatuko duen ordenantza hori indarrean jartzeak? Honela azaldu du Obrak, Zerbitzuak, Mantenua eta Auzoak batzordeko buru Oscar Garciak: "Pankarta bat jartzen duenak argi izango du noiz jarri eta kendu beharko duen, kartelak dagokien lekuan jarri beharko dira eta ez horma edo luminaria baten... Hori guztia arautu beharra dago".

Arautegia indarrean jarri ostean, edozein isun edo zigor ezarri aurretik "pedagogia" egingo du gobernuak. "Badakigu aldaketa handia dela hainbat herritarrendako, ohitu egin beharko direla. Arazo bat dagoenean arazo hori identifikatu dugu, banaka. Kartel bat lekuz kanpo jarrita badago kartel hori jarri duenarekin jarriko gara harremanetan eta ordenantzaren berri emango diogu. Pedagogia lan horren ostean uste dugu herritarrak konturatuko direla Arrasate hobeto dagoela ordenantzarekin ordenantza barik baino", adierazi du Garciak.

Pintadengatik 55.000 euro

Gobernuak ohar bidez jakinarazi duenez, 2015eko ekainetik Udalak 55.000 euro bideratu ditu pintadek eragindako garbitasun gastuetarako. "Ez du inolako zentzurik alde batetik bitartekoak jartzeak, esaterako, giza eskubideen aldeko adierazpenak jartzeko eta, bestetik, Udalari galera ekonomikoa sortuko dien pintadak egitea ordenantzatik kanpo. Izan ere, konbentzituta nago Udalak herriari zor diola hiri garbia, erakargarria eta txukuna izatea", gaineratu du zinegotzi sozialistak. 

Garciak ez du uste ordenantzak adierazpen askatasunaren kontra egiten duenik: "Interes politiko argia dago atzetik, gezurra da". Gogora ekarri du Donostian, Gasteizen, Zarautzen, Durangon eta beste zenbait herritan badagoela halako ordenantza bat: "Ez dut uste herri horietan bizi direnek askatasun gutxiago dutenik. Argi dago denok ez dugula berdin  pentsatzen eta horregatik, hain justu, arauak jarri behar dira. Askatasunaren kontzeptua ezin daiteke nahi dena, nahi den lekuan eta nahi den moduan esateko eskubide moduan ulertu. Herritar guztiek nahi dutena esan ahal izateko lan egingo dut baina errespetua bermatu beharra dago. Horretarako sortu zen ordenantza, arrasatear guztiei begira. Arazoak sortu ahala aldaketak egin daitezke, noski".

Balorazioa, txosten teknikoek

Ordenantzak jasotzen ditu honako puntu hauek, beste askoren artean: kartelak aurrez eskatu barik jarri ahalko dira hartarako lekuetan, eta leku horietatik kanpo jartzeko baimena beharko da; pankartak jartzeko  zein mural artistikoak margotzeko baimena beharko da, eta pintadak egitea debekatuta dago kanpoko edozein lekutan. Adierazpenetako mezuen balorazioa –iraingarriak edo giza eskubideen aurka doazen, esaterako–  txosten teknikoen arabera egingo da.

Erlazionatuak

Garbiketa ordenantza behin betiko onartuta, gobernuak espero du urte amaierarako jartzea indarrean

Arrasate

Agintaldian udalbatza barruan eztabaida gehien eragin dituen garbiketa ordenantza behin betiko izaeraz onartu zen atzoko osoko bilkuran. EAJren eta...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.