Epaileak libre utzi du Enrike Letona, baina inputatuta segitzen du

Enrike Letona.

Auzitegi Nazionalean bere kontra dagoen akusazioa ukatu ondoren, libre utzi du epaileak Enrike Letona. Fiskalak Letonaren kontrako badaezpadako neurriak hartzea eskatu du: pasaportea kentzea eta astero epaitegira sinatzera joatea. Baina epaileak halako neurririk hartu gabe utzi du libre, epaitegitik deitzen dutenean bertara joango dela hitz emanda.

Izan ere, 1981eko sumario batean inputatu dute arrasatearra, beste kide batekin batera. Eta epailearen aurrean deklaratu eta bere kontrako akusazioa ukatu ondoren ere, Letonari ez diote jakinarazi Auzitegi Nazionalak zabaldutako prozedurak aurrera egingo duen ala ez.

Hori horrela, epaitegitik berriro ere deituz gero bertaratzeko obligazioa jakinarazita, eta Letonak hala egingo duela hitz emanda, –"orain arte egin dudan moduan", Letonak epaileari esan dionez– epaileak aske utzi du arrasatearra.

Edozein modutan, Letonak salatu du Auzitegi Nazionala ikertzen dabilen atentatuan ez dutela "inolako frogarik" bere parte-hartzea erakusten duenik, eta hau guztiau "mendekua" dela salatu du. "Dirudienez, sumario zaharrak zabaltzen ari dira", azpimarratu du, aditzera emanez, bere antzeko egoeran egon litezkeela etorkizunean beste batzuk ere.

Gehienezkoa beteta

Era berean, gogora ekarri du berak bete dituela legeak ezartzen duen gehienezko kartzela-zigorra, eta horrenbestez, eta zigor eskaera berririk balego, betetako kartzela-zigorraren barruan sartu beharko luketela; "hala ere, aske utzi eta berriro atxilotu nindutenean beste bost hilabete egon nintzen preso, beraz, barrura sartzen zaituztenean, sekula ez dakizu zer gerta daitekeen", esan du.

Tortura salaketa

Bestalde, Letonak oraingo akusazioa ukatzeaz aparte, epailearen aurrean salatu du 1987an atxilotu zutenean, berak deklaratutako guztia torturapean deklaratu zuela, salatu ere salatu zituela torturok, eta hala ere, oraindik ez dituztela ikertu.

Hain justu, Letonaren kasua da Eusko Jaurlaritzak eskatuta Paco Etxeberria auzi-medikuak zuzendutako torturari buruzko Tortura 1960-2013 txostenean identifikatutako 4.009 kasuetako bat.

Erlazionatuak

Enrike Letona deklaratzera deitu dute Auzitegi Nazionalera

Arrasate

Enrike Letona arrasatearra Espainiako Auzitegi Nazionalera deklaratzera deitu dute. Gaur pasako da Madrilen, epaitegiaren aurretik, artxibatuta zeg...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.