Eguraldi kontuengatik Monterron parkean barik, Kulturateko areto nagusian egin zuten atzo gauean AEDk San Juan jaien bezperatan antolatzen duen bertso jaialdia.
Lau izan ziren Altutik Bertso Eskolako Xabi Betzuen Tito-k jarritako gaiak landu zituzten bertsolariak: Julio Soto, Arrate Illaro, Nerea Elustondo eta Joanes Igeregi. Batez ere ofiziotan aritu ziren ordubete pasatxo iraun zuen saioan eta gaurkotasuneko gaiak jorratu zituzten gehienbat, umoretik eta ikuspegi orijinaletik helduta.
"Akaso ordu edo egun aldaketagatik egia da beste urte batzuetan baino ikusle gutxiago etorri direla, baina publikoa nahiko gaztea izan da eta horrekin ezusteko positiboa hartu dugu", azaldu dute bertso saioaren balorazioa egiterakoan AEDtik.