Bi ediziotan kirol proba entzutetsua bilakatzea lortu du Arrasate-Udalatx mendi lasterketak. Bigarren edizioko arrakasta elkartasun keinu eder batekin borobildu zuten atzo Mondraitz Kirol Klubeko ordezkariek.
Bigarren edizioa antolatu aurretik helburu sozialak babesteko erabakia hartu zuten eta kanpora egin beharrean, Arrasaten bertan beharra dutenei laguntzea da Mondraitzekoen asmoa. Hurrengo edizioetan ere ekimen solidarioekin jarraituko dute.
Gertutik ezagutzen zuten Mondraitzekoek Naiara Agredaren kasua eta horregatik erabaki zuten lehen laguntza hari ematea.
Dirua, lepokoa ordaintzeko
Naiara Agredaren senitartekoek biziki eskertu dute Mondraitz klubekoen keinua. Haren amak aitortu duenez, ez da hilabeterik pasatzen behar berriak sortu gabe; dioenez, Naiarak 24 orduz behar du laguntza. Dependentziaren Legearen bidez jasotzen duten laguntza gurasoak lanean dauden bitartean Naiara zaintzen duen pertsonari ordaintzeko erabiltzen dute eta hortaz aparte beste hainbat gasturi ere egin behar izaten diote aurre. Fakturak oso garestiak izaten dira, baina Mondraitz klubari esker lortutako dirua ondo etorriko zaie; berriki erosi dioten lepokoa ordaintzera bideratuko dute diru hori.
Diruaz harago, baina, Naiararen senideek keinua eskertzen dute bereziki. Naiararen amak, Almudena Viecok halako jende gehiago egon beharko litzakeela uste du: "Esan diet eurei, gutaz akordatu izana itzela dela. Mila-mila esker, benetan".
