Maider Arregi eta Jose Luis Gorrotxategi bertsolariak Iturbideko egoiliarrekin izan dira

Maider Arregi eta Jose Luis Gorrotxategi Iturbideko egoiliarrekin.

Gipuzkoako Foru Aldundiak eta Lanku bertso zerbitzuak elkarteak elkarlanean egindako Adin Adin izeneko proiektuaren baitan izan ziren eguenean bi bertsolariok Arrasateko nagusien egoitzan. Bertsolariekin batera, egoiliarrek euren bizipenekin girotu zuten saioa.

Iturbide egoitzatik aurreratu dutenez, Maider Arregi eta Jose Luis Gorrotxategi bertsolariek saio polita egin zuten: "Bat-bateko bertsoekin, kantu herrikoiekin eta egoiliar bakoitzaren bizipenekin girotuta egon zen saioa eta oso polita izan zen", esan dute.

Adinekoendako espreski antolatutako hamaika bertso-emanaldi jasotzen dituen programa da Adin Adin, beste horrenbeste egoitzatan. Gipuzkoako Foru Aldundiak eta Lanku bertso zerbitzuak elkarteak elkarlanean egindako proiektua da eta saioetako bi bailaran izan dira; eguenean Arrasateko Iturbiden egindakoeta eta aurretik, Bergarako Mizpirualden egin zena.

Bertsoaren onurak

Programaren bultzatzaileek bertsoak adineko pertsonengan duen eragin positiboa azpimarratzen dute. Nagusi askorentzat, euskal kulturako erreferente bakarra dela diote eta kasu horretan bitarteko bihurtzen dela adineko pertsonek euren memoria landu dezaten.  Horrekin batera, euren bizipenak, oroitzapenak, gogoratzen dituztela eta zaila dela motibazio hori beste modu batera lortzea. Horrekin batera, parte-hartzea bultzatzen duela ere nabarmentzen dute, euren arteko harremanak hobetzen dituela, eta bertsoen atzean dagoen umore puntu horrek depresioari aurre hobeto egiten laguntzen duela.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.