Modu askotan irakur eta goza daitekeela frogatzeko egitaraua Arrasaten

Urriaren 24an ospatuko da Bibliotekaren Eguna, Estatu osoan. 1997a ezkero urtero antolatzen den ekimena da, gizarteari irakurtzearen garrantzia gogoratu eta bibliotekarien lana goraipatu gura duena. Bada, Arrasateko Bibliotekak egitarau berezia antolatu du aurten: "Kultura aniztasuna nabarmendu nahi izan dugu aurten; horregatik, egitarauan bertan hainbat hizkuntzatan esan nahi izan dugu ongi etorri. Bibliotekak guztiendako ditu ateak zabalik", adierazi du Asun Agiriano bibliotekariak.    

Hasteko, Azalerako ipuinak ekimenaren arrakasta aipatu du Agirianok: "Hirugarren ikastaroa da, eta jendeak kanpoan geratu behar izan du. Laugarren bat antolatuko dugu, kanpoan geratu direnak lehenetsita. Bailaratik jendea ere etorri zaigu...". Tailer bereziaren helburua da ahozko tradizioa eta haur literatura ezagutzea. Masajeak eskaintzen duen hitzik gabeko komunikazioa baliatuz, hitz jokoak, poemak, kantuak eta ipuinak lantzen dira. Gaur, eguena, bigarren saioa egin dute, eta hilaren 15ean amaituko da; Saroa Bikandi hezitzaile durangarrak dihardu ikastaroa gidatzen.  

Ipuin kontalaria

Umeendako ipuin kontalaririk ere ez da faltako. Maite Frankok Nire etxea zure etxea da saioa gidatuko du, adinen araberako bi emanalditan: "Hilero ipuin kontaketa saio bat antolatu gura dugu", gaineratu du Agirianok. 

Aurreiritziak gainditzeko bide

Bibliotekaren Egunaren bueltan antolatutako "beste ekintza interesgarri bat" da Batxilergoko ikasleei zuzendutako Gezurkeriak etorkinei buruz deritzon erakusketa eta tailerra. Etorkinen gaineko aurreiritziei eta zurrumurruei "narratibatik eta irudi artistikotik" aurre egitea dute helburu erakusketak zein tailerrak. Bestalde, umeendako zuzeneko musika ere badakar egitarauak. Gaztelupeko Hotsak-en bidez 2 Princeses Barbudes ikuskizuna antolatu dute, umeendako: "Zuzenean gozatzeko emanaldia izango da, eta besteak beste, jolasteko euskarazko abestiak eskaintzen ditu". Hilaren 23an izango da, Bibliotekaren Egunaren bezperan.  

Bi liburu irakurgailuren zozketa

Egitaraua borobiltzeko, bi liburu irakurgailu zozketatuko dituzte urrian zehar liburuak maileguan eramaten dituzten erabiltzaile guztien artean. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.