Kartelada berezia Arrasaten, deklaratzera deitu dituzten senideak babesteko

Jokin Bereziartua Lizarazu 2015ko uzt. 8a, 10:14

Arrasateko hiru presoren senide Audientzia Nazionalean deklaratzera deitu dituztela-eta, kartelada berezia egin zuten atzo, martitzena, Seber Altube plazan. Gaur, eguaztena, Juan Mari Sanpedro eta Luis Urrutiak deklaratuko dute Madrilen; atzo karteladan parte hartu zuten, asteroko ohiturari eutsiz. Ramon Arkauzek, ordea, atzo deklaratu zuen: "Fiskalak oso modu oldarkorrean egin dizkigu galderak. Euren helburua da abokatuen eta senideen arteko harreman ona kaltetzen saiatzea".

Audientzia Nazionaletik irten berri Arkauzek atzo GOIENAri adierazi zionez, abokatuekin duten harremanaren gainean galdetu zien fiskalak senideei, Eloy Velasco epailearen aurrean. Abokatu horiek zergatik aukeratu dituzten eta azken urtean abokatuei ordaintzeko metodoa zergatik aldatu duten galdetu zieten, besteak beste. Arkauzen ustez, abokatuen eta senideen arteko harremana kaltetzea da zitazio horien helburua. 20 bat minutuko deklarazioak izan ziren eta dena "normal" joan bazen ere, senide gehienak "oso urduri" egon zirela jakinarazi du Arkauzek. Gaur beste zazpi senidek deklaratuko dute eta horien artean daude Juan Mari Sanpedro eta Luis Urrutia arrasatearrak.

Arrasate