Udal eta Foru hauteskundeak 2015

Baleike-Si Se Puede: "Politika egiteko era berri bat eskaini gura diegu arrasatearrei"

Jokin Bereziartua Lizarazu 2015ko mai. 5a, 11:05
Baleike-Si se puede taldeko kideak Santa Barbara parkeko Goikobalun.

Baleike-Si Se Puede Arrasateko taldeak hauteskundeetarako programa eta zerrenda aurkeztu zituen atzo Arrasateko Santa Barbara parkean: "Ilusioz eta lan egiteko grina handiarekin ekiten diogu abentura honi. Herria aldaketa politikoaren irrikaz dagoela nabaritu dugu eta politika egiteko era berri bat eskaini nahi diegu arrasatearrei". 

Gaineratu zutenez, Baleike-Si Se Puede taldearen programaren gakoak ongizate soziala eta erakundeetako gardentasuna dira: "Zentzu horretan proiektu bat lantzen ari gara babestutako etxebizitzen arloan, etxebizitza galtzeko arriskuan dagoen jendearen eta finantza erakundeen artean bitartekari lanak eginez eta etxea galdu dutenei soluzio bat eskaintzeko".

Ongizatean, "hutsune handi bat"

Ongizate arloarekin jarraituz, Arrasateko egoera soziala ikertzerako orduan datuetan "hutsune handi bat" nabaritu dutela diote: "Ondorioz, erraminta bat landu nahi dugu non bi urtero inkesta eta hausnarketaren bidez Arrasateri argazki sozial bat egingo diogun, errealitatea zein den jakin eta hala erabakiak eraginkortasunez bideratzeko".

Gardentasun sail bat Udalean

Gardentasunari dagokionez, Udalean gardentasun sail bat eratzea litzateke euren asmoa, Udaleko funtzionamendua, informazioa eta prozedurak herritarren eskuetan jartzeko, "ondo azalduta eta sinplifikatuta". Honakoa ere gaineratu zuten atzoko aurkezpenean: "Gastuen eraginkortasuna eta proiektuen burutzea ere hausnartuko ditugu, gastatzen dugun kopurua ondo erabiltzen den ikertzeko".

Jokin Zaitegiko aparkalekua irekitzea

Azkenik, hirigintza arloan ere Jokin Zaitegiko aparkalekua zabaltzea dute begiz jota: "Arrasatek trafiko eta aparkaleku arazo gero eta handiagoak ditu. Egunez debaldekoa eta gauez mantentze gastuak ordaintzeko prezio sinboliko batez".

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak