Dorleta Kortazar: "Bizitzaren beste ikuskera bat transmititzeko balio dute ipuinek"

Maialen Torres 2015ko mar. 7a, 11:02

Bihar Ezpain gorriak helduentzako ipuin kontaketa eskainiko du arrasatearrak Irati tabernan, 18:00etan. Hilaren 10ean, berriz, Santa Marinan izango da, ordu berean, umeentzako ipuinak kontatzen, hezkidetza gaitzat hartuta.

Beti ikasten da zerbait ipuinetatik?

Ipuinek, kontatzen hasi aurretik ere, mezu bat bidaltzen dute, eta, mezu bat duten heinean, irakasgaia ere badute. Espazioak, gorputzak, testuak, irudiek... guztiak du eragina.

Zeren arabera aukeratzen dituzu?

Uste dut ipuinak aukeratzen duela norbera. Egia da idatzizkotik ahozkotasunera pasatzeak atzean lan handia daukala, baina lan hori eginez izugarri disfrutatzen dut. Inguruan gertatzen den guztiari adi egon, eta hori ipuin bihurtzea da gakoa.

Zuk zeuk sortzen dituzu kontatzen dituzun ipuinak?

Helduentzako kontatzen ditudanak, gehienbat, nik sortutakoak izaten dira eta haurrenak, berriz, norbaitek aurrez idatzi, amestu edota pentsatutakoak.

Zertarako erabiltzen dituzu?

Bizitzari buruzko beste ikuskera bat transmititzeko balio dute ipuinek, eta nire ipuinetan hori lortzen saiatzen naiz. Beste bide batzuetatik jasotzeko zailak diren eredu eta balioak helarazten dizkiet entzuleei.

Bada oraindik ohiturarik ahozko kontaketarako?

Esango nuke baietz. Agian, ez ipuin formatuan, baina gustatzen zaigu elkartzen garenean kontu kontari egotea. Egia da, ordea, garai batean ipuinek gaur egun komunikabideek eta ikastetxeek betetzen duten funtzioa zutela eta esparru hori galdu egin dela.

Edonork konta ditzake ipuinak?

Guraso askok beldurra izaten dute, baina gure seme-alabentzat, ziurrenik, gu izango gara munduko kontalaririk trebeenak, batez ere, gertutasuna eta ekintzan bertan jartzen dugun maitasuna kontuan hartuta.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak