Sozialistendako Saiolaneko proiektua "oso garrantzitsua" da Arrasaterendako: "Horregatik erabaki politiko irmo bat behar dugu Udalean etorkizunean etor daitekeen fusioa eta deslokalizazioa ez dadin eman", adierazi du PSE-EEko bozeramaile Aritz Arrietak.
Udal Gobernuaren eta EAJren arabera, "goizegi" gaia lantzeko
Udal Gobernuak –Bilduk eta Aralarrek osatzen dute– kontra bozkatu du; ez fusioaren alde daudelako, baizik eta Saiolan barneratuta dagoen "hausnarketa prozesuan" ez dutelako eragin nahi eta, diotenez, "goizegi" delako gaiaren gainean iritzi bat emateko: "Saiolan bezalako beste ekimen batzuk daude Gipuzkoan, eta ireki dute prozesu bat komunean dituzten ezaugarriak zeintzuk diren aztertu eta sinergiak aprobetxatzeko. Hausnarketa prozesu horretan gaude orain eta egia da proposamen batzuk badaudela mahai gainean; horietako bat da fusioarena. Baina uste dugu goiz dela oraingoz aldeko edo kontrako jarrera bat erakusteko", adierazi du Udal Gobernuko bozeramaile Maider Morrasek.
EAJ abstenitu egin da, fusioarena "agertoki posibletako bat" dela eta oraindik "goizegi" dela argudiatuz: "Gogoeta estrategiko baten barruan daude, eta kide guztiek onartutako hausnarketa prozesu bat izan da. Guri heldu zaigun informazioaren arabera, zortzi agertoki posibletatik bitan bakarrik proposatu da fusioarena. Horregatik iruditzen zaigu oraindik ez dela garaia mozio bat aurkezteko", uste du Maria Ubarretxena zinegotziak. Beraz, mozioak ez du aurrera egin.
Turismo joera handiko legearen aurka
Bestalde, Ibai-Artek proposatutako mozioak aurrera egin du. Merkatarien arabera, 7/1994 merkataritza aktibitatearen buruzko legearen aldaketa Eusko Jaurlaritzako merkataritza konpetentzien "inbasioa" da eta komertzio txikiei kalte egiten die "zuzen-zuzenean". Aldaketa horren aurka agertu dira Bildu eta Aralar eta sozialistak. EAJk, ordea, kontra bozkatu du merkatarien bi eskaerak "bidean" daudelako Jaurlaritzan eta Legebiltzarrean. Hala, mozioa onartu egin da.
