UNESCO Etxearen txostenak agerian jarri du 2.200 milioi pertsona pobreak direla edo pobreziaren mugan daudela. Horri aurre egiteko, oinarrizko zerbitzu sozialen prestazio unibertsala eta gizarte-babesaren eta enplegu betearen inguruko politika irmoak proposatzen ditu txostenak, eta agerian jartzen du berariazko politiken eta beste gizarte-arau batzuen bitartez soilik lortuko dela bidezko giza garapen iraunkorra. Txosten hori gizarteratuko dute bihar, euskaraz ere badagoena, lehen aldiz.
Ekitaldia
Aurkezpen ofizialean honako hauek hartuko dute parte: Patxi Baztarrikak, Eusko Jaurlaritzako Hizkuntza Politikako sailburuordeak; horrelako txotenak euskaraz edukitzearen eta arazo horiek erkidego bakoitzeko hizkuntzan jorratzearen garrantziaren inguruan hitz egingo du. Jon Altunak, Mondragon Unibertsitateko errektore-ordeak; txosten ofizialaren aurkezpen-ekitaldiko anfitrioia eta moderatzailea izango da. Maider Marañak, UNESCO Etxearen programen koordinatzaileak; txostena aurkezteaz eta munduko pobrezia-egoerari buruz hitz egiteaz arduratuko da. Eta azkenik, Leire Uriartek, Mondragon Unibertsitateko kooperazioaren arloko eta “Ekonomia Solidarioa” Masterreko irakasleak; gogoeta egingo du txostenaren alderdi garrantzitsuenen eta alderdi zehatzen inguruan.
Ekitaldirako sarrera doakoa izango da, baina, eserleku-kopurua mugatua denez, aurrez izena ematea eskatu dute antolatzaileek, 944 276 432 telefonora deituz, edo on-line izena emateko orriaren bidez edo helbide elektroniko honetara mezu bat bidalita: n.viota@unescoetxea.org