"Oso pozgarria izan da askotariko herritarrak elkartu garela ikustea. Euskaldunak gara eta euskaldunoi dagokigu gure etorkizuna erabakitzea. Horretan ez daukat inongo zalantzarik eta horregatik etorri naiz". Hitz horiek izan ditu Jose Antonio Altuna Arrasateko alkate izandakoak Gure Esku Dago taldeak antolatutako sinadura ekitaldiaren ostean.
Kulturateko klaustroan egin dute ekitaldia. Gure Esku Dago taldeko Edurne Baltzategik balorazio "oso ona" egin du ekitaldia amaitu berri: "Oso ondo joan da, hunkigarria izan da benetan. Herrian batera ikusi ez dudan jendea ikusi dut gaur, Euskal Herriak zer izan gura duen euskaldunok erabaki behar dugula esateko. Malkoak irten zaizkit uneren baten".
