Behin plana onartuta, ikusgai jarriko da, gura dutenek interesekoak iruditzen zaizkien unitate eta ondasunekiko eskaintzak egin ahal izan ditzaten. Momentuz, bi taldek erakutsi dute interesa: Cevital aljeriarrak eta CNA kataluniarrak.
Likidazio Plana
Zehazki, likidazio planean Fagor Etxetresnetako eta Edesako aktiboen salmenta hiru bloke nagusitan bereiztu da. Lehen fase batean, enpresak osorik saltzeko eginiko eskaintzak aztertuko dira eta bigarren fase batean unitate produktiboengatik eginiko eskaintzak. 25 egun egongo dira horretarako, eta ondoren, aktiboekin lotutako beste fase batzuk egongo dira.
Fagor Etxetresnen, Edesaren eta unitate produktiboen, salmentei dagokionez, eskaintzaileen seriotasuna eta kaudimena garantizatuko den prozesu bat egongo da, eta eskaintza onena hartuko da kontuan.
Likidazio plan honen helburua da jarduera industriala berriz martxan jartzea, ahalik eta lanpostu gehien kontserbatu ahal izateko.
Eskaintzak
Cevitalek, hain justu, "eskaintza loteslea" aurkeztu zuen atzo epaitegian, Eskoriatzako eta Garagartzako lantegiak erosteko. Bere produktuak Cata, Nodor eta Apelson marken bitartez komertzializatzen dituen Kataluniako taldea 16 milioi euro ordaintzeko gertu azaldu da, eta bere asmoa litzateke Debagoieneko bi lantegi horietako aktibitateari eta 500 lanposturi eustea.
Cevitalek, bere aldetik, Fagor Brandt-ekiko –kooperatibaren Frantziako filiala– eta Fagorren nazioarteko markekiko interesa erakutsi du, baita Eskoriatzako eta Garagartzako lantegiekiko ere, CNAk moduan.
