Ze helburu dituzte jardunaldiek?
Helburu hirukoitza izango dute: alde batetik, gurasoak haur eta gazteen sexualitatera hurbiltzeko ahalegina egingo dugu; bestetik, sexualitate osasuntsu baten beharra azpimarratuko diegu; eta azkenik, sexu hezkuntzak duen garrantziaz jardungo dugu.
Zergatik aukeratu duzue Sexualitate aske eta osasuntsu baten alde izenburua?
Izen horrekin adin tarte guztiak batu nahi ditugu. Sexualitatea aske, askatasunez bizi izateko daukagun eskubideagatik; eta osasuna, sexualitatea osasunez bizi behar dugulako. Ez bakarrik gaixotasun sexualengatik, osasun mentala ere azpimarratu behar dugu, sexualitatea modu sano baten bizi behar baitugu zoriontsu izateko. Gurasoei esan behar zaie beraien seme-alaben heziketaren parte oso garrantzitsua dela sexualitatearena.
Zer-nolako zalantzekin etortzen zaizkizue gurasoak halakoetan?
Adinen arabera, zalantzak desberdinak izan ohi dira. 0-6 urte arteko gurasoen zalantzak, adibidez, etxean ikusten dituzten jarrerekin lotuta joaten dira. Esate baterako, haurrak genitalak etxeko sofaren aurka igurzten dituela ikusten du guraso batek, eta horrek zalantzak sortzen dizkio: "Zertan ibiliko da umea?", galdetzen dute. "Normala da?". Guk "normal" hitz hori ekidin egiten dugu, baina gurasoek beti planteatzen diguten zerbait da. 7-12 urte arteko haurretan, berriz, sexu identitatearen inguruan hitz egingo dugu; eta 13-18 urteko adin tartean sexu identitateaz.
Sexualitateak tabu izaten jarraitzen du oraindik gurasoen artean?
Guraso eta gizartearentzako tabu izaten jarraitzen du sexualitateak, zalantzarik ez dago. Izan ere, sexualitateari buruz hitz egiterakoan, hizketaldiak brometan hasten ditugu. Sexualitateari buruz serio hitz egiteko, berriz, mugak ditugu; lagunekin, senideekin... asko kostatzen zaigu sexualitateaz hitz egitea.