Arrasateko Kultura sailaren aurreikuspen guztiak gainditu ditu film horrek. "Arrakasta izango zuela bai, baina ez zen espero horrenbesterainokoa izatea" adierazi dute Arrasateko Udaletik.
Horrelakorik sekula ezagutu ez dutela zioten Amaia antzokiko langileek. Ikusleek birritan egin behar izan zuten burruka filma ikusteko, lehiatilan sarrerak eskuratzeko lehenengo, eta zenbatu bariko txartelak zirenez, antzokirako atean gero, jarleku onaren bila joateko orduan.
Zapatuko 19:30eko saioaren irteeran, pozik zegoen orokorrean, jendea. Barre asko egin zutela kontatu zuten eta inor mintzen ez duen topikoetan oinarritutako filma dibertigarria dela. Filmean parte hartzen duen jendea eta azaltzen diren kokalekuak ezagutzeak ilusioa egiten duela ere zioten.
Gomendatzeko moduko filma, beraz, asteburuan Amaia antzokian ikusteko aukera izan zutenen iritziak oinarri hartuta. Izan ziren baina, sarrera barik atean geratu zirenak ere.
