19:30eko saioaren irteeran, pozik ikusi dugu jendea orokorrean. Barre asko egin dutela kontatu digute eta baita filmean parte hartzen duen jendea eta azaltzen diren kokalekuak ezagutzeak ilusioa egiten duela ere. Nor edo nor entzun dugu, ordea, ez zaiola batere gustatu esaten ere.
Lehen saiokoak moduan, 22:00etarako emanaldirako sarrerak erosi dituztenak ere denborarekin joan dira antzoki atarira, zenbakitu gabeak baitira sarrerak; 21:00ak alderako hasi da jendea bertaratzen.
Eta gaur filma ikusi gabe konformatu beharko duenik ere bazen tartean, leihatilak aurrez irekitzen zituztela jakin ez eta sarrerak erostera betiko ordu inguruan joan ostean. "Komentario onak entzun ditugu eta badugu filma ikusteko gogoa, baina ez da ezer gertatzen; estreinatu berri dute eta izango dugu ikusteko aukera, hemen ez bada beste nonbait", zioen bikote batek.
Hurrengo saioak
Bihar, domeka, 19:30ean botako dute; eta astelehenean, 20:30ean. Leihatilak 17:00etan eta 18:30ean zabalduko dituzte, hurrenez hurren.
