Horretarako auzolana egin gura dute hilaren 29an; Bedoñako aparkalekuan geratu dira, 09:00etan. Parte hartu gura dutenek bi bide dituzte izena emateko: 943 79 68 48 telefonora deitzea edo izen-emate orria betetzea.
Pello Garai Ingurumen teknikariak azaldu dizkigu zeintzuk diren auzolanerako asmoak.
Zer egingo da auzolanean?
Zapatu goiz horretarako lau lan izango ditugu batez ere. Batetik, goiko larrean dauden zuhaitz gazte batzuk babestuko ditugu, banan-banan, itxitura txiki batzuk jarriz. Bigarrenik, artadi batetik doan bide zahar bat berreskuratuko dugu. Hirugarrenik, konturatu gara goiko zelai horretan egin dugun itxitura bat nahiko gogorra dela eta pasabide batzuk irekiko ditugu animaliek bertatik igarotzeko aukera izan dezaten. Azkenik, umeei begira batez ere, artelan bat egingo dugu naturako elementuekin.
Ez da lehen saiakera Kurtzetxikin auzolana egingo dena, ezta?
Ez. Gabonen aurretik egitea zen asmoa baina oso eguraldi txarra egin zigun eta bertan behera uztea erabaki genuen. Ea oraingoan eguraldiak laguntzen digun auzolanerako, goiz-pasa eder bat pasatzeko.
