Xabier Urizar 'Gautxori' preso arrasatearra aske geratu da, espetxean 29 urte egin ondoren

Jokin Bereziartua Lizarazu 2014ko urt. 14a, 10:24

Xabier Urizar 'Gautxori' lagun eta senideekin batera, espetxetik irten berri

Xabier Urizar 'Gautxori' euskal preso arrasatearra 08:30ak aldera irten da Puerto de Santa Mariako (Cadiz) espetxetik eta han zituen zain, ordurako, senideak eta lagunak. Bertaratutako lekukoen arabera, "oso hunkigarria" izan da 'Gautxori'-ren eta haien arteko elkartzea. Preso arrasatearra 29 urte egon da espetxean.

Atzo goiza ezkero abiatuak ziren hogei bat pertsona Xabier Urizar espetxetik irteten zenerako, espetxe atarian zain egoteko. Hamaika ordu inguruko bidaia egin dute, 1000 kilometrotik gora. Orain guztiak Arrasatera bidean dira.