Hanzhi Wang txinatarra, Arrasate Hiria Akordeoi Lehiaketa irabazten duen lehen emakumea

Arrasateko Akordeoi Lehiaketek urteroko maila altua eta azken urteetako parte-hartze zabalena izan dituzte aurten. Hanzhi Wangek irabazi du Arrasate Hiria Nazioarteko txapelketaren 21. edizioa. Lehen aldiz emakumea, lehen aldiz txinatarra. Hauspoz elkarteko presidente Aitor Furundarenak balorazio positiboa egin du eta, era berean, Arrasate Hiria Lehiaketaren "izen handia" ere ekarri du gogora: "Izen eta prestigio handia dauka Arrasateko lehiaketak, parte-hartzea ikustea besterik ez dago. Nazioartean hiru lehiaketa dira izen handiena dutenak; hau da horietako bat".

Arrasateren nazioarteko enbaxadore bihurtu da akordeoia beste behin, Arrasate Hiria Akordeoi Lehiaketa –aurtengoa 21. edizioa– erreferente da-eta han eta hemen. Hauspoz elkarteak antolatzen dituen lehiaketek eta jaialdiak babes handia dute erakundeen partetik; Jaurlaritzak, Gipuzkoako Aldundiak eta Arrasateko Udalak diruz laguntzen dute. Eta maila apalago baten bada ere, SUDC elkartea ere laguntzaile leiala da urtero.

Mundu osoko akordeoilariendako eta bertakoendako ere erakusleiho garrantzitsua dira Arrasateko lehiaketak. Gipuzkoako  Lehiaketaren 34. edizioa izan dute aurten: "Gipuzkoako izena izan arren Gipuzkoako, Euskal Herriko eta Espainiako akordeoilariak etortzen dira. Aurten autobus bete bat etorri zaigu Galiziatik eta Ipar Euskal Herritik ere izan dugu bisita lehen aldiz", esan digu Hauspoz elkarteko presidente Aitor Furundarenak. Parte hartzea azken urteetako zabalena izan da aurtengoa, Furundarenaren arabera. Horri maila altua gehitu behar zaio, izan ere, mundu zabalean ospe handia duten akordeoilariak  izan ditugu gurean; atzoko azken fasea ikustea besterik ez dago lehiaketa honek duen mailaz ohartzeko. Beraz, antolatzaileak "oso pozik" daude aurtengoak eman duenarekin.

Egubakoitzetik domekara Arizmendi Ikastola, Kulturate eta Amaia antzokia izan ziren saioen guneak, baina aurten, iazko esperientzia errepikatuz, kalejira ere egin zuten zapatu goizean, kaleak girotzeko.

Lehia bai, pedagogia ere bai

Lehiakortasuna bultzatzeaz gain, Hauspoz elkarteak badu helburu pedagogikoa ere: "Txapelketa hau oso handia da, jende askok hartzen du parte. Saiatzen gara guztia helburu pedagogikotik lantzen, baina jaialdia da erabat pedagogikoa dena. Ez dago lehen posturik; dominak ematen dira eta sailkapen txiki bat ere badago, baina saiatzen gara lehiakortasun guztia kentzen. Oso polita da, haurrek zein gurasoek ilusio handiz hartzen dute, eta oso giro polita egoten da", adierazi digu Furundarenak zapatuko jaialdiaren gainean. Atzo iluntzeko gala eta sari banaketarekin borobildu zuten aste bukaera. Datorren urtera arte!

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.