Gartziaren arabera, Hondakinen Mahaiak ezezkoa eman dio atez atekoari: "Sozialistok ez dugu onartuko inork arrasatear guztion bizitza baldintzatzea". Gogorarazi duenez, irailean tokiko batzordeak erabaki zuen PSE-EE Hondakinen Mahaitik altxatzea, hasieratik baldintzatuta zegoelako eta "haren helburu bakarra" atez atekoa ezartzea zelako.
Bosgarren edukiontzia, "merkeagoa, erosoagoa eta garbiagoa"
Bederatzi hilabetetan %70 gaika biltzeko "exijentziarekin" ere ez dago ados Arrasateko PSE-EE: "Bosgarren edukiontziaren edo atez atekoaren bidez jaso, hondakin kantitate bera jasoko da. Kontua da edukiontzia merkeagoa, erosoagoa eta garbiagoa dela", uste du Gartziak.
EAJ, Bilduri "oxigenoa" ematen
Era berean, Gartzia "desengainatuta" dago EAJren jarrerarekin: "Bilduri oxigenoa ematen ari dira herritarren aurka joan arren. Babes hori ulertezina da, atzean estrategia maltzur bat ez badago behintzat. Bildu egiten ari den kudeaketa negargarriak ondorioak izango ditu".