Iztuetak maila pertsonalean ezagutu zuen Arrasateko seme kuttuna: "Ezagutu nuenean 20 bat urteko mutiko bat baino ez nintzen eta esan dezaket berebiziko zirrara eragin zidala haren ezagutzak ondoko urteetan zehar". Besteak beste, Jokin Zaitegik euskaraz idazteko egindako ahalegina goraipatu zuen euskaltzale ezagunak: "Euskal gaiez erdaraz idazten zuten euskal intelektualak salatu zituen 1951eko idatzi baten".
Joan Diazen lana "hutsune handi bat" betetzera datorrela esan zuen: "Jon Diazen lan hau hutsune handi bat betetzera etorri da, izan ere, hari buruzko lan gehienek ez dute agerian jarri izan Zaitegiren bizitza intelektualean ardatz izan zen lanbide akademiko berria; ez da aipatu izan haren ekarria irakaskuntzaren alorrean, ikastetxe mailan zein maila unibertsitarioan".
(Argazkia: Jokin Zaitegi. Iturria: Utriusque Vasconiae).
Zaitegi, hezkuntza alorretik
Liburuaren egileak azaldu zizkigun liburuaren nondik norakoak: "Hezkuntzaren alorretik hartzen dugu Jokin Zaitegiren bizitza, obra eta ibilbidea. Zaitegiren bizitza aztertzen dugu sakonean, urratsez urrats. Profesionalki zer egin zuen aztertzen du liburuak". Tesi formatuan egina dago eta tesi horren muinetik sortzen da eguenean aurkeztu zen liburua.
Tesia 2011rako gertu zuen Diazek baina argitalpenerako arazoak direla-eta 2013ko maiatzera arte ez du argia ikusi: "Azkenean lortu dugu ateratzea eta horregatik oso pozik gaude. Argi genuen aurkezpena Arrasaten izan behar zela, Jokinek duen protagonismoa ikusita bere herrian aurkeztu beharrekoa zelako. Udalaren laguntzari esker lortu dugu Arrasaten aurkeztea".