Aitziber Lasarguren Mankomunitateko merkataritza-dinamizazio arduradunaren arabera, "giroa sortzea" da asmoa: "Bertako musikarien bidez kaleak alaitzea da helburua, aldi berean bertako kontsumoa bultzatzeko".
Arrasate Musikal izango da protagonista nagusia, lau emanaldietatik eurenak izango dira-eta hiru. Hasierako asmoa zen Arrasate Musikalek bakarrik parte hartzea baina hileko azken bi aste bukaeretan zarzuela dagoenez, azken saiorako Txorbela otxotea gonbidatu dute. Ez dira guztiak egongo, otxoteko kide batzuk ere zarzuelan daudelako.
"Eguraldiak laguntzen badu polita izan daiteke guztiondako"
Arrasate Musikaleko Edorta Aiastuik aurreratu digu Big Bandak lehenengoz joko duela kalejiran: "Berez geldi jotzen dugu, baina oraingoan mugitu egingo gara jotzen dugun bitartean. Musikariendako erronka bat izango da". Era berean, Aiastuiren arabera, alde zaharreko txoko ezberdinetan geldialdia egingo dute hiru edo lau piezako saioak eskaintzeko. Hilaren 16an, berriz, hari-instrumentuak jotzen dituzte ikasleak aterako dira kalera: "Bospasei musikariz osatutako hiru talde egingo ditugu eta alde zaharreko hiru lekutan egongo gara. Ordu erdi inguruko emanaldia eskaini ostean lekuak txandakatzen joango gara".
Oraindik ez dute alde zaharreko zein txokotan joko duten zehaztu; eguraldiaren arabera aukeratuko dituzte leku horiek. Arrasate Musikalekoendako ere "interesgarria" da ekimena: "Musika kalera ateratzea ederra da guretako. Eguraldiak laguntzen badu polita izan daiteke guztiondako", gaineratu du Aiastuik.