Domekan, berriz, bizikleta bira egingo dute Seber Altube plazatik irtenda (11:00). Eskoriatzara joango dira, Eskoriatzako Mugikortasun Astearekin bat egingo dute-eta. Beste urte batzuetan baino luzeagoa izango da ibilbidea, besteak beste, Garagartza auzoan geldialdia egin behar dutelako. 17 kilometro inguruko ibilbidea izango da.
Birzikleta Azokak, hamar urte
Birzikleta Azoka izan ohi da ekintzarik arrakastatsuena. Aurten, gainera, berezia izango da hamar urte beteko dituelako. Materiala uzteko aukera egon da atzo iluntzera arte eta, atzo bildu zena kontuan hartu gabe, 124 artikulu jaso dituzte. Errepideko bizikleta "askotxo" jaso dituztela esan digute Udaleko Ingurumen Saileko arduradunek. Beraz, 10. Birzikleta Azokan ere egongo da zer erosi.
Saltzen ez den materiala eta saldutakoaren zenbatekoa jabeari itzuliko zaio irailaren 26an udal azokan, 17:00etatik 19:00etara. Bestalde, Josu Pereda Ingurumen zinegotziak Mugikortasun Planaren barruan azken bi urteetan eman diren urratsen berri eman zuen Arrasate Irratian. Alde zaharraren peatonalizazioa eta TAO sistema jartzeko erabakia aipatu zituen, besteak beste. TAOren kasuan, gogora ekarri zuen asmoa dela abendurako martxan jartzea proba modura, unibertsitate inguruan.