Mugikortasun astean buru belarri sartuta daude Debagoieneko hainbat herri, bada Arrasaten ere, lanean ari dira autoari alternatiba bilatu eta herritarrengan garraio publikoa nahiz bizikletaren erabilera bultzatzeko.
Besteak beste, Hiribusa dohainekoa izango da aste osoan zehar, hala ere, ekintza nagusiak asteburuan antolatuko dituzte.
Bizikleta martxa, Birzikleta Azoka edo emisio txikiko ibilgailuen erakusketa
Bizikleta martxan, eskoriatzako mugikortasun astearekin bat egingo dute aurten, bi herriek 17 kilometrotako ibilbidea batera egingo dute-eta. Egun garrantzitsuena ordea, zapatua izango da. Zapatuan Biteri plazan eta Seber Altube plazan, emisio txikiko ibilgailuen erakusketa eta zirkuitua eta Birzikleta azoka egingo dituzte hurrenez hurren. Birzikleta azokak gainera aurten hamar urte beteko ditu, eta Mugikortasun Asteko hitzordu arrakastatsuena bilakatu da dagoeneko. Bertan, etxean gordeta ditugun bizikleta zein patinak jasotzen dituzte, gero horiek saltzeko; eta dagoeneko materiala jasotzeari ekin diote. Nerea Lazpiurren arabera, gutxi gora behera 60 artikulutik gora jaso dituzte.
Materiala eramateko aukera zabalik
Gaur goizean herritar dezente hurbildu da Arrasateko Udal azokan dagoen lokalera, gehienbat bizikletak eramatera. Materiala eramatea nahi izanez gero, arratsaldean 17:00ak eta 19:00ak artean bertan egongo dira, eta eguenean ere 11:00ak eta 13:00ak artean eta 17:00ak eta 19:00ak artean. Birzikleta azokak baina, bi helburu nagusi dituela esan digu Nerea Lazpiurrek. Lehena, mugikortasun jasangarriaren inguruko kontzientziazio kanpaina aurrera eramatea; eta bestea, materiala berrerabiltzeko ohitura areagotzea.
Beraz, zapatuan 11:00etatik aurrera zabalik egongo den 10. Birzikleta azokara joateko arrazoiak badaude.