"Arrasateko Goikobaluko gaztelua Atxorrotzekoaren egoitza izan zela dio, adibidez, Sagredok. Eta entzundakoa da, baita ere, Atxorrotzetik bertatik Goikobalu ikusten zela, eta Goikobalutik Elosu", kontatu du Xabier Zubizarretak, Zuztarrak Errotuz elkarteko kideak.
Elkarlanaren emaitza
Bada, historia eta antzinako ohiturak aintzat hartu eta herriko hainbat kultura elkarterekin harremanetan jarri ostean, egun osoko egitaraua prestatu dute irailaren 14rako: "12:00etan Seber Altuben kalejira hasiko dugu, txistulari, trikitilari eta bestelakoek lagunduta, 13:00ak ingurura arte. Orduan, Herriko Plazan elkartu, eta Goikobalurako igoera egingo dugu. 15:00etan jarri dugu bazkarirako ordua (norberak ekartzen duena bazkalduko dugu), baina lehenago bertsoak eta bestelakoak ere izango dira. Baita Aramaioko sagardogileak, Ekin elkartekoek egindako taloak eta txosna bat ere.
Arratsaldean, kalean ere bai
Eta arratsalderako joko eta bestelako ekitaldiak antolatu gura ditugu, erromeriaz aparte, jakina; izan ere, elkarlanean oinarritutako ospakizuna izango da", zehaztu du Larraitz Trojaolak Zuztarrak Errotuz elkarteko kideak. "Planteamendua da herriko kultura elkarte bakoitzak bere ekarpena egitea. Adibidez, bazkalostean Portaloia elkartearen eskutik kantuan egingo dugu…" , gehitu du Zubizarretak. "Eta 18:00etan denok batera jaitsiera egin eta Herriko Plazan, 20:00-20:30ak arte dantzaldia izango da; Goikobalura etortzen ez diren herritarrek ere ikus dezaten egun horretan zerbait berezia izan dela herrian", bukatu du Trojaolak.