Horrez gain, Diputazioak iragarritako datu batzuk ere aipatu ditu Arrasate Garbik: "Debagoienean hondakinen %35,9 gaika biltzen dugu dagoeneko eta hori, gainerako zatiaren %55a den hondakin organikoen bilketa kontuan hartu barik. Hau da, organikoak biltzeko edukiontziak jartzearekin bakarrik, ziur gaude %60a gaika batzearen helburua lortuko genuela".
Horren harira, honakoa galdegin dute: "Beraz, zertara dator gaur egungo edukiontzien bitartez egiten den zabor bilketa gutxiesteko helburuarekin lortzen den lelo etengabea? %33a bakarrik birziklatzen dugula, aldi berean gaur egungo sistemaren gainbehera sustatzen delarik?".
"Predikatzeari utzi"
Alkateari honako mezua igorri diote: "Herri hau gobernatzen dutenak, predikatzeari utzi eta arrasatear gehienon alde lan egiten jar daitezela. Hau da, euren betebeharrekin bete dezatela, hondakinen gaikako banaketa hobea lortzeko, bosgarren edukiontzia ezarriz. Beti ere, formazio, kontzientziazio eta sentsibilizazio plan baten lagunduz".
Hala, Inazio Azkarragaurizar alkateari dimititzera gonbidatu diote: "Noiz arte jarraituko duzu zure burugogorkerian, Alkate Jauna? Gai honetan arrasatear gehienok asebetetzeko gai ez baldin bazara, Bergarako alkateak hartu duen antzeko pausoa hartu beharko zenuke, dimititu".