Liburuaren aurkezpen soila izango da?
Liburuaren edukietatik abiatuko dut hitzaldia baina orain arte pasatu zait, dagoen jakin-minarekin, gaiak abiadura handia hartu duela eta hondakinekin zerikusia duten beste gai batzuk ere tratatzen direla. Liburuak, bi hitzetan esateko, azken hamar urteotan errauste plantak egitea erabaki zenetik gaur egunera arte hondakinak kudeatzeko moduaz egon den polemika lantzen du. Eztabaida pozgarria da, denoi dagokigu arazoari irteera ematea.
Arrasateko egoera eta polemika zein den ezagutzen duzu?
Arrasaten baduzue esperientzia nahikoa hondakinen kudeaketa txar batek zein ondorio ekar ditzakeen jakiteko. Akei izeneko errauste planta izan zenuten han eta esango nuke Arrasateko inork ez lukeela onartuko halakorik errepikatzea, nahiz eta teknologia hobearekin izan. Horrek zein ondorioetara garamatza? Bada, hondakinen kudeaketa eredua aldatu behar dugula; hor denoi dagokigu ardurak hartzea.
Sortu den polemikaren gainean, uste dut interes asko daudela eztabaida desbideratzeko. Atez atekoa deabrutu gura izan dute; hor dago Oñatiko adibidea. Atez atekoa bilketa sistema bat da, oso emaitza onak ematen dituena. Egia da, era berean, oso sistema zorrotza dela baina, finean, denok arduratu behar dugu gure zaborra kudeatzeaz; hori da atez atekoak planteatzen duena.