Zer iruditzen zaizu urtez urte halako nazioarteko jaialdi bat egiteko aukera izatea?
Ikaragarria da halako kultura, hizkuntza, ahots, irudimen joko... denak batu eta halako bi egun ikusgarri izatea. Nork bere herrialdearen ikuspuntua, ironia, drama… ekartzen du, nork bere modura kontatzen ditu gauzak, eta, gainera, besteek zer eta nola kontatzen duten entzuteko aukera izatea paregabea da, ze askotan ez baitugu elkar ezagutzen, eta esperientzia bikaina izaten da.
Katalunia, Argentina, Euskal Herria, Txile eta Uruguai: bost herrialde, bost kultura desberdin; zer dugu batera?
Ba, azkenaldian, gauza asko, kultura hedatzen ari da eta gauza asko ditugu batera. Eta gero, ba, jaialdian parte hartzen duten askok bidaiatu egiten dute, munduko txoko desberdinak ezagutzen dituzte, eta, hortaz, antzeko gauza asko ditugula konturatzen gara. Adibidez, Kolonbiara joan nintzenean, nik pentsatzen nuen greziarren inguruko mitologiaz hitz egin eta inork ez zidala ulertuko, eta, nire gozamenerako, gauza askoren berri zuten bertaratutakoek.
Jaialdiaren helburua herrialde desberdinetako kultura ezagutzera ematea da, baina gaur egun behar hori existitzen dela uste duzu?
Adierazteko beste modu bat da, jaialdi honetan zuzenean gaude eta jendea metro gutxi batzuetara dago; orduan, ikusleen emozioa, barrea, emozioak sentitzen dituzu, eta haiek zureak, ezta? Eta hori, azken baten, bizipen bilakatzen da, ez dago pantailarik tarteko, ez dago elektronikarik, ez da informaziorik jasotzen, baizik eta bizipen bat. Horrenbestez, beharra badagoela pentsatzen dut; hau da, kultura ezagutzera emateko beharra ikusten dut egungo egoeran.
Divinas seducciones istorioa kontatuko diguzu; zerbait aurreratzerik bai?
Urteak dira mitologia greziarraz hitz egiten dudana esklusiboki. Beste ipuin batzuk ere baditut, baina horretan dihardut, gure esentzia bertan dagoela uste dudalako. Izan ere, gizakiak Jainkoak sortu zituenean, bizipenen, beldurren, bizioen, desiren eta beste hainbat konturen bitartez konexio bat egoteko asmoz egin zuen; horrenbestez, esan daiteke Jainkoen berdinak garela. Gainera, nik aukeratutako istorioak pikanteak, erotikoak dira; beraz, konturatuko gara mekanismoak berdinak direla, eta grazia egiten du.
Euskal Herrian ibilia zara?
Bai; Oihulari Klownekin zirkuitu bat egiten ibili nintzen, Bergara eta beste hainbat herri ezagutu nituen, eta asko gustatu zitzaidan. Gainera, desberdintasun asko ikusi nituen bertan; adibidez, Bergaran egon nintzenean ikusi nuen jendea ohituta zegoela kontuak, ipuinak entzutera, eta giro bikaina izan genuen bertan; bizi izan dudan giro hoberenetakoa izan zen, gainera. Beste herri batzuetan, aldiz, ikusleek begiratu egiten zidaten aurpegi serioarekin, eta ez zuten ezer esaten, baina, antza, asko gustatu zitzaien; beraz, pozik geratu nintzen bidaiarekin eta esperientziarekin.