Aitzurrak hartuta, gogoz landatu dituzte zuhaitzak gaztetxoek. Askorendako, gainera, zuhaitzak landatu dituzten lehenengo aldia izan da gaurkoa. Esperientzia ona izan da, beraz, gaztetxoendako gaur goizekoa. Zuhaitzak landatu ostean, gainera, txorizozko bokadiloak jan dituzte indarrak hartzeko eta oparitxo bat ere jaso dute; eskolarako zorro jasangarriak.
Bihar ere bai
Arrasateko 6. mailako ikasleek ospatu dute, beraz, Zuhaitz Eguna. Baina orain arte Arrasaten Zuhaitz Eguna egun bakar batez ospatu izan den arren, aurten bi egunetan ospatuko da eguna. Izan ere, ospakizuna "hankamotz geratzen zela iritzita, herritar guztiei parte hartzeko aukera zabaltzea" erabaki du Arrasateko Udalak. Eta, hala, aurten bigarren egun bat ere ezarriko dute, asteburuan.
Hala, bihar, zapatua, izango da herritar guztiei zabalik dagoen hitzordua. 10:00etan Institutuko goiko eraikinean elkartuko dira eta landaketak Zigarrolako auzoan Antoña erreka inguruan egingo dituzte. Intxaurrondoak eta gaztainondoak landatuko dituzte bihar.