"Orain arte arrasatearrei pultsua hartu diegu eta oso babestuak sentitu dugu geure burua, sentsibilitate eta adin ezberdineko herritarren babesa jaso dugulako. Horregatik, beste urrats bat eman nahi dugu orain, eta kalera aterako gara. Herritarrei dei egiten diegu alkateari eta Udal gobernuari, argi eta garbi esateko, atez atekoari, ez!". Halaxe diote sustatzaileek.
"Egoerarekin kezkatuta"
Diote, Atez atekoa stop herri plataforma otsailean sortu zela, Arrasaten atez atekoa ezarriko zutela iragarri zuenean alkateak. Harrezkero, diote, "egoerarengatik kezkatuta", hainbat herritar batzartzen hasi dira, gaia aztertu eta "atez atekoaren kontra egiteko".
Atez atekoaren aurka azaltzeaz gain, bosgarren edukiontzi marroia ezartzea eskatzen dute.
Bestalde, beste herri batzuetan sortu diren herri plataformekin bat egin dutela diote; hala nola, Bergara, Oñati edota Zarautzekoekin. Herritarrei dei egiten diote haiekin bat egin dezaten.