Hurrengo hitzaldiak honako egunetan dira: maiatzaren 10ean, Musakolan, hango Herri Eskolan (Musakolakoendako); maiatzaren 17an, Kulturateko areto nagusian (Gelma, Zerrajera eta erdigunekoendako); maiatzaren 23an, Etxaluzeko erretiratuen etxean (San Andres auzokoendako); maiatzaren 24an, Arimazubin (Erguin, Uribe auzoa eta Arimazubikoendako) eta maiatzaren 30ean, Kulturateko Loramendi aretoan, nekazaritza auzokoendako.
Zero zabor filosofia
"Udalak behar beharrezkoa ikusten du zero zabor politikan oinarritutako hondakinen kudeaketa ezartzea. Baina momentu honetan, eta helburu horretara begira, hondakinak gaika biltzea da dugun aukera bakarra. Argi dago gaur egun dugun bilketa sistema dela hondakinekin dugun arazoaren eragile nagusietako bat eta Arrasateko Udalak une honetan eraginkorrena den sistema, atez atekoa,ezartzearen aldeko apustua egin du. Maiatzeko hitzaldi horien helburua da, honi guztiari buruz informatuz, arrasatear guztiei aukera ematea gai honen oinarrian dagoen arazoaz jabetzeko. Arrasatear denok dugun arazoaz kontziente izaten bagara, guztiok izango garelako irtenbidearen parte", esplikatu dute udal iturriek.