"Ez gaude batzorde informatiboen kontra, baina dagoeneko hartuta dauden erabakien inguruko itxurakerietan ez dugu parte hartuko", esan du Paco Gartzia sozialistak, Udaleko Ingurumen batzordekideak. Gainera, kanpaina horrek izango duen "kostu handia" salatu du, 40.000 eurotik gora, eta "atez atekoaren aldeko propaganda hutsa" dela esan du.
PSE-EErendako, iragarritako kanpaina "Bilduk Arrasaten atez atekoa inposatzeko egin duen ibilbide-orriaren zatia" da. Ibilbide horren hasiera 2010eko maiatzean kokatzen du PSE-EEk, "atez atekoa ezartzearen aldeko txostena onartu zuenean Mankomunitateak".
Gartzia Rayak honakoa gaineratu du: "Ez da egia atez atekoarekin %80 birziklatzen dela. Atez atekoa eta bosgarren edukiontzia bilketa-sistemak dira eta, hortaz, batekin zein bestearekin ezer ez da birziklatzen".
Onartu ondoren Gipuzkoa dela "bilketa selektiboan aurreratuen" dauden lurraldeetako bat, PSE-EEk "kezkatuta" dagoela esan du, "batzuek iruzur egiten ikusten ditugulako, zaborra negozio errentagarri bikain bihurtu den susmoa dugulako".
Debagoien osorako hitzaldia Arrasaten
Martitzenean, hilaren 17an izango da, Arrasateko Etxaluze erretiratuen egoitzan, 19:00etan. Hizlariak hauek izango dira: Susana Corcuera, PSE-EEren Gipuzkoako Udal Politika arduraduna, eta Manuel Blazquez ingurumen teknikaria.