Jaurlaritzak onespena eman dio Udalatx barruko harrobiari

Eusko Jaurlaritzak Kanpanzar harrobiaren lur azpiko esplotazioaren gaineko ingurumen eragina onartu egin du. Dio harrobia lur azpian egiteko proiektua "berritzailea" dela, ingurumenarendako hobea dela, "paisaiari egiten dizkion kalterik nabarmenenak eliminatu" egiten dituztelako, eta baita ere "landareei eta faunari" egiten dizkion kalteak ere. Hori horrela, Jaurlaritzaren aldetik ez dago arazorik Kanpanzar enpresak Udalatx barrutik harria ateratzen segi dezan. Arrasateko Udalak gaur aztertuko du gaia, Tokiko Gobernu Batzarrean.

Hori bai, Jaurlaritzaren toxostenak azpimarratu du ondo aztertu beharko liratekeela harrobi mota horrek lur azpiko iturriengan izan ditzakeen eragin posibleak, eta horretxegatik komeni dela zundaketa berriak egitea, ahalik eta zehatzen finkatzeko esplotazio mailarik baxuena zein izan beharko litzatekeen; maila hori, gutxienez, akuiferoen saturazio mailatik hamar metro gainetik egon beharko litzateke.

Bada, Jaurlaritzaren onespena jakinda, Udalean galdetu dugu ea zer gertatuko den orain Kanpantzar harrobiarekin, izan ere, Arrasateko Udalak, berez, uste du "hirigintza ikuspuntutik planteatutako ustiapen berriak ez duela egun udalerriko planeamenduaren estaldurarik". Bestela esanda, ez dagoela Egitamu Orokorrean sartuta, eta berez, harrobi horrek gaur egun ez dauka lekurik Arrasateko planeamenduan.

Zigor espedientea

Bestalde, Arrasateko Udalak joan den uztailean ulertu zuen ikerketari berari dagozkion lanak bukatutzat eman dituela Cantera de Campanzar enpresak. Eta beraz, mendi barruko meategitik kareharria ateratzen segitu gura badu, jarduera lizentzia berri bat eskatu beharko duela. Hori egin ez duenez, zigor espedientea abiarazi zuen urriaren amaieran harrobiaren jardueraren kontra. 

Alegazioak falta

Bada, Udaleko iturriek jakinarazitakoaren arabera, eurei ere helarazi die Jaurlaritzak ingurumen eragina, eta gaur landuko dute gaia Udal Gobernuaren asteroko batzarrean. Dena den, gaineratu dute Jaurlaritzak ez dituela kontuan hartu eta ezta aipatu ere egiten Arrasateko Udalak proiektu horri aurkeztutako alegazioak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.