Edozelan ere, horrekin batera, gaineratu dute batzorde informatzaileak ez egiteak ez duela esan gura "egitasmoak edo proiektuak gelditzen direnik". Honelaxe azaldu dute: "Batzorde informatzaileek gaietaz sakon hitz egin eta informazioa gardentasunez tratatzeko aukera ematen dute. Ondorioz, alderdi bakoitzak iritzia eman dezake eta proposamenak egin eta posible denean adostasuna lortu. Baina batzorde informatzaileak ez dira organo erabakigarriak, erabakiak gobernu batzordean edo udalbatzan hartzen dira gaiaren arabera".
Eta azpimarratu dute badabiltzala eguneroko erritmoa berreskuratzen: "Garzonen autoa segurtasunez interpretatu ahal izateko denbora behar izan dugu, Udaleko nahiz beste instituzio batzuetako zerbitzu juridikoei zalantza ugari sortzen zizkielako; baina esan daiteke Arrasateko Udala, egunetik egunera, lan erritmo normala berreskuratzen ari dela. Aurrekontua gauzatzen jarraituko dugu. Bestalde, jaso dugun elkartasuna –alderdi batzuk, udal langileak eta herritarrak oro har– eskertu nahi genuke. Era berean, adierazi nahi dugu Inoren falta nabaritu egiten dela; baina prest gaude haren hutsunea betetzen saiatzeko; eta, ez dugu ahaztu behar Ino lehenbailehen udaletxera itzul dadin lanean jarraituko dugula eta ziur gaude arrasatearren elkartasuna handia izango dela hori lortzeko. Eta noski, Inori eskerrak eman gura dizkiogu, momenturo erakutsi duen duintasunagatik".
Lanen banaketa
Dena den, alkatea kartzelaratzeak halabeharrez lanen banaketa beharra ekarri du. Horren gainean zera argitu dute: "Legeak dioenaren arabera, alkateak egindako izendapenak hark soilik alda edo ezaba ditzake. Beraz, momentuz Inok zeuzkan batzordeak, Pertsonala eta Hirigintza, jarduneko alkate Oihana Aranburuk landuko ditu eta gainontzeko arloek lehengo berean jarraitzen dute".
Gutxiengoan, lehengo moduan
Bestade, orain arte udal gobernua gutxiengoan bazegoen, gutxiengo hori nabarmenagoa da orain, alkatea kartzelan dagoela. Horri zela aurre egingo dion ere azaldu du udal gobernuak: "Legealdi honetan udal gobernuak ez du gehiengorik izan; ez lehen EB-Zutik koalizioarekin batera geundenean, ezta ondoren ere. EB-Zutik koalizioak gobernua utzi zuenetik, zazpi zinegotzi izan gara gobernuko kide; aldiz, alkatea bahitu digutenetik, sei gelditzen gara. Honek zer suposatzen duen? Ba orain arte bezala edozein proiektu edo egitasmo aurrera ateratzeko beste batzuen adostasuna lortu behar dela; hau da, 11 bozka. Bestalde, aipatu ere, orain arte ere adostasunetara iristeko saiakerak egin ditugula eta hemendik aurrera ere horrela jarraituko dugula".
Horren harira, gaineratu dute beharrezkoak direla gainontzeko alderdi politikoekin harremanak, herriaren onurarako: "Gainontzeko talde politikoekin harremana legealdi hasieratik gaurdaino antzera mantendu dela esan dezakegu, ezinbestekoak dira alderdien arteko harremanak mantentzea Arrasateren alde lanean jarraitu ahal izateko".
Bukatzeko, azpimarratu dute Arrasate "salbuespen egoeran" dagoela: "Argi dago ez dela egoera normala gaur bizi dugun hau. Agerikoa da demokraziaren izenean Euskal Herriari salbuespen egoera inposatzen zaiola eta Arrasaten egoera honen itzala nabarmena da".