Eskolak, esan bezala, gaur hasiko dira Mojategiko futbol zelaian, 17:00etan. 1998. 1999. eta 2000. urteetan jaiotako neska-mutikoek har dezakete parte ekimen interesgarri honetan.
Iaz bezala, Alberto Perez izango da gaztetxoenei futbolaren hastapenak erakutsiko dizkiena. Izan ere, hastapenetan hartzen diren ohiturak baitira garrantzitsuenak. Hala, neska mutiko bakoitzaren trebetasunean zentratu baino, Perezek futbolaren oinarrizko lezioak irakatsiko dizkie haurrei, hau da, diziplina, errespetua eta adiskidetasuna.
Iaz 50 bat neska mutiko
Mondraren historian iaz jarri zen martxan lehen aldiz ekimen hau. Eta lehen aldia izan bazen ere, ezin arrakastatsuagoa izan zen; 50 bat neska mutiko aurkeztu ziren.
Parte hartze altuan izango zuen eragina Mojategi futbol zelai berriak. Futbolean lehen urratsak emateko ez baita gauza bera Mojategiko zelai artifizialean jokatzea edo aintzinako Atxabalpeko hondarrean egitea.
Bertan aurkeztu, besterik ez
Mondraren eskola gaztean partehartzea sinplea da oso, nahikoa da gaur 17:00etan Mojategin aurkeztea. Entrenamendu baten antzera, hasiberriek futbolaren teknika ikasteko ariketak egingo dituzte batez ere; hala nola, baloiarekin trebatzeko ariketak eta futbol partidu laburra.
Mondran sartzeko aukera
Gaztetxoenei kirol elkarte bat eta futbola zer den irakastea dira ekimen honen helburu nagusiak. Baina, noski, bide batez, Mondraren harrobia sendotzeko ere balioko du. Iaz, adibidez, aurkeztu ziren neskekin kadete taldea egin zuten, eta egun senior mailako jokalari Maitane Gallastegik zuzentzen du taldea. Mutilei dagokienez, bestalde, portzentaje altua pasatzen da Mondraren alebin taldera. Gaztetxoenek soberan dute ilusioa, baina Mondran amaitzeko aukera dutenez, urduritasuna ere presente izango da.