Koro Navarrok (Donostia, 1955) irabazi du Jokin Zaitegi sariketa

Itzultzaile donostiarrak itzuliko du Doris Lessing nobel saridunaren 'Belarra kantari'. Aurtengo Durangoko azokarako gertu izatea gura dute liburua. Horretarako Kutxak emandako 5.500 euroko beka izango du.

XXI. Jokin Zaitegi Itzulpen Sariketa (AEDk urtero Nobel Sariduna euskaratzeko ematen duena) erabaki berri da. Idoia Gilleneak, Aiora Jakak eta Alberto Martinez de la Cuadrak osaturiko epaimahaiak, aurkezturiko proiektu guztiak aztertu eta gero, Koro Navarroren lana saritzea erabaki zuen. Berak jasoko du Kutxak eskainitako 5.500 euroko saria, eta laguntza honekin jardungo du hemendik udazken hasiera bitartean, liburua 2008ko Durangoko Azokarako prest edukitzeko. Doris Lessing, Iranen jaio eta Zimbabwen hazitako idazle britainiarraren lehen eleberria euskaraz irakurri ahal izango da horrela, Elkar argitaletxearen eskutik: The grass is singing (Belarra kantari), Afrikako zenbait herrialdetako arrazismoa eta emakumearen zapalketa-egoera erakusten dituen obra, besteak beste.

Koro Navarro 

Koro Navarro Etxeberria (Donostia, 1955), itzultzaile profesionala, hainbat sari irabazitakoa, besteak beste egile hauen euskaratzailea: Hammet, Poe, Kipling, Twain, Steinbeck, Dylan Tohomas, Bashevis Singer, Carver… 2003 urtean Euskadi Literatura Sarietan Euskarazko Itzulpen Onenari saria eman zioten.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.