Apirilean hainbat arrasatearrek Kaonbi, Katuak Ondo Bizi, elkartea sortu zuten, kalean bizi diren katuei laguntza emateko helburuarekin. Elkarte honen helburuetako bat kalean bizi diren katuentzako etxetxoak jartzea da, eta dagoeneko 5 jarri dituzte Erguin auzoan, beste bat Gazteluondon eta beste bat Makatzenan jartzekoak dira.
Babesteko eta erditzeko
Orain arte jarritako etxetxoei katuek harrera oso ona egin diete. Batez ere hotza egiten duenean erabiltzen dituzte eta erditzera ere bertara joaten dira katuak. Etxetxoak 50 zentimetro zabalera eta 60 zentimetro altuerakoak dira. Egurrezkoak dira eta gainean plastikozko geruza bat dute, hezetasunari aurre egiteko.
Jaiotze-tasa kontrolatzea
Etxetxoak jartzea ez da Kaonbi elkartekoek duten helburu bakarra, euren erronketako bat Arrasateko katuen jaiotza-tasa kontrolatzea da. Horretarako herriko katuak antzutzen hasi dira, Zarugalde eta Altamirako albaitarien laguntzarekin. Momentuz Erguin eta Gazteluondoko katuak kontrolpean dituzte, hala ere helburua herriko katu guztien hazkunde-tasa kontrolatzeko da.
Jabeak aurkitu
Elkarteak egiten duen beste lan bat katuentzat jabeak bilatzea da. Orain arte katakume bat baino gehiago zaindu behar izan dute jabe bat bilatu arte. Horren harira, herritarrek eman duten erantzuna ezin hobea izan dela diote Kaonbiko kideek. Guztira 17 katakumeei jabea bilatu diete. Bilatutako jabe gehienak Arrasatekoak dira, baina, Azpeitira eta Legazpira ere eraman dituzte katuak.