Are gehiago. Ikutixorako egitasmoak ere bazeuden Udalean, lehenagoko legealditik: "Mendebaldeko saihesbidea eraikitzeak ekarriko duen lur betelana jasotzea eta ondoren, jarduera ekonomikoetarako lurzoru beharrari aurre egingo dion esparrua sortzea"; industrialdea, bestela esanda.
Bertan behera uzteko arrazoiak
Ba esandako moduan, bertan behera geratu da hori guztiori. Bi arrazoi eman ditu Udalak.
Bata da mendebaldeko saihesbideko (Olandixo) obrak hasita daudela eta hango lurrak beste nonbaitera isurtzen dabiltzala; beraz, ez dagoela Ikutixoko zabortegi beharrik.
Bestea da egoera ekonomikoa "kaskarra" dela, "jarduera guztiak moteldu" dituena; beraz, industrialde berrien beharrik ere, momentuz, ez dute ikusten.
Ikutixo eremuaren izaera aldatzeaz gainera, "Basoaren Babesa" esparruan sartuko dute aurrerantzean.
Meatzerrekako industrialdea finkatuta
Bestalde, aldaketa horrekin batera, beste bat ere egin du Udalak Egitamu Orokorrean. Meatzerrekako industrialdearekin dauka zerikusia. Egin duena da industrialde haren izaera aldatu eta bidea eman mota guztietako industriak kokatu ahal izateko.
Orain arte garapenik ez
Kontua da, indarrean zegoen araudiaren arabera, Meatzerrekako industrialdean industria bakarrak zeukala egoteko eskubidea. Baina gaur egun Civasa, OMU eta bestelako negozioak ere badaude. Horrek esan gura du ordenazioz kanpo zeudela jarduera horiek eta berez, Meatzerrekatik joatea tokatuko litzaiekeela. Horrez gainera, "industria bakan erabilerak suposatzen du esparrua azalera handia behar duen enpresa bakar batek okupatzea. Hori dela-eta, esparruak ez du garapenik izan", dio Udalak.
Pabilioi txikiak
Orain, berriz, mota askotako industria jarduerak kokatu ahal izango dira han: "Onartzen du pabilioi txikiak egin eta hainbat enpresa kokatzea bertan".