2008. urtean, Garaia Berrikuntza Guneak bere ateak zabaldu zituenean, 4
milioi euroko kapital handitzea onartu zuen proiektuak aurrera eramateko
likidezia behar zuelako. Urte horretan, Garaiak dituen lau
bazkideetatik hiruk, Mondragon Taldeak, Gipuzkoako Foru Aldundiak eta
Eusko Jaurlaritzak, eskatutako ekarpen ekonomikoa egin zuten: milioi
bana euro.
Arrasateko Udalak, Garaiako bazkide txikienak, 250.000€ inguru jarri
zituen eta urriaren 7an onartu zuen ekarpenaren beste zatia jartzea, hau
da, falta zitzaizkion 756.440€ak jartzea. Erabaki honek eztabaida
handia sortu zuen aurtengo urriaren 7ko osoko bilkuran, berrikuntza guneak
hasieran planteatutako helburuak bete ez dituelako.
Garaia proiektu gaztea dela eta oraindik ere emaitzak lortzeko goiz dela
adierazi du Andoni Gartziak. Izan ere, berrikuntza gunea sortu zenetik
10 urte bete arren, horietatik 7 azpiegiturak eraikitzen pasatu dira.
Aurreko asteko osoko bilkuran, Garaiaren kudeaketa egokia izan ez dela
nabarmendu zuten eta Gartziak krisiari egotzi dio berrikuntza gunera
aurreikusitakoa baino enpresa gutxiago joatea.
Garaiako zuzendariak berrikuntza gunean 400 lanpostu berri sortu direla
nabarmendu du. Arrasateko Udalean egon daitezkeen eztabaiden harira,
berriz, berrikuntza guneak sor ditzakeen zalantzak Udalak Garaiako
administrazio-kontseiluan duen ordezkariaren bitartez aurkezteko eskatu
du.