Euskal Herriak Bere Eskolak hezkuntza sistema nazionala lortzea du helburu eta horretara beharrezkotzat jotzen du gurasoen inplikazioa.
Aurkezpen ekitaldian parte hartutako guraso eta irakasleen artean Arrasateko egungo euskal hezkuntzaren analisia eta diagnostikoa egin zuten eta ondorio nagusia izan zen euskararen erabilera zabaldu egin behar dela, eta batez ere 15 urtetik gorako ikasleen artean. Baliabideen urritasuna ere aipatu zen euskal hezkuntzaren gabezien artean, eta etxean eta lagun artean egiten den euskararen erabilera ere oso garrantzitsuak direla ondorioztatu zuten.
Euskal Herriak Bere Eskola erakundeak uste du taldearen helburu nagusia izan behar dela benetako euskal kurrikuluma lortzea. Izan ere, uste dute Eusko Jaurlaritzako Hezkuntza Sailak aurkeztutako kurrikuluma iruzurra dela. Hori horrela, ikasturtearen lehenengo hiruhilabetean horren inguruko salaketa egiten saiatuko dira eta bigarren hiruhilekoan, gero, euskal kurrikulumaren garapena lortzea litzateke helburua. Azkenik hezkuntza nazionala lortzeko ekimen mobilizatzaileak egiteko asmoa daukate.
Lau pertsonek osatzen dute, oraingoz, Arrasateko lantaldea, baina aurkezpenaren helburua izan zen proiektuan parte hartuko duen pertsona gehiago batzea. Interesa dutenek arrasate@euskaleskola.org helbidera idatzi besterik ez dute egin behar.