Tailerrak Sonia Ulazia Adindu enpresako kideak zuzenduko ditu eta aurreratu duenez, "Dementzia gaixoekin nola jokatu erakustea izango da helburua". Izan ere, adituak dioenez, "gaixoak, batez ere gaitzaren lehen fasean, asko sufritzen du".
Hartzailea, parte-hartzaile
Ikastaroan azalpen teorikoak "ezinbestekoak" dira, "hartzailea gaixotasunaren inguruan informatzeko". Hala ere, Ulaziak gaineratu duenez, ikastaroak "izaera parte-hartzailea" izango du eta horretarako ariketak eta dementzia kasuen azterketa praktikoak egingo dituzte, besteak beste. Hala, dio irakasleak, "guztiok ikasiko dugu gehiago eta saioak emankorragoak izango dira". Izan ere, honakoa uste du Adinduko kideak: "dementzia duenaren ondoan bizi denak askotan ez du jakiten nola jokatu. Bada, ikastaroan jarrera zehatz batzuk hartzen erakusten asko saiatuko gara". Noski, hartzaileak jarrera aktiboa erakutsi beharko du ikastaroa arrakastatsua izan dadin.
Gaitza gertutik bizi dutenei
Gura duenarendako ateak zabalik izango ditu dementziaren gaineko ikastaroak, Ulaziak jakinarazi duenez. Edozelan ere, gaixotasuna gertutik bizi dutenendako dago bereziki zuzenduta. Hala nola, gaixoaren edo pertsona edadetuen zainketa lanetan dihardutenendako edo gaixoaren senideendako.
Oraingoz, hedapena ekiditea bakarrik
Antzeko sintomak dituzten burmuineko gaitz ezberdinen multzoari deitzen zaio Dementzia, eta gaixoarengan eta ingurukoengan eragin handia du. Ez du sendabiderik eta beraz, tratamendu orok gaitza ahalik eta geldoen hedatzea du helburu. Sintomei dagokienez, hiru mailatan eragiten du Dementziak gaixoarengan: maila kognitiboan –memoria, ikasteko gaitasuna, lengoaia eta pentsamendua kaltetzen ditu– , maila funtzionalean –gaixoari asko kostatzen zaio eguneroko eginbeharrak burutzea– eta azkenik, maila psikologikoan –oso gogorra da, batez ere lehen fasean, gaixoa oraindik jakitun denean–.