Martxoaren 31n zabaldu zuten liburuen azoka Seber Altube plazan eta joan den domekara bitartean egon da zabalik. 10 egunetan jarraian, Arrasateko herritarren hainbat gorabehera ikusi ditu azoka horrek. Besteak beste, saltzaileek ondorioztatu dute Arrasateko herritarrak herrian egoten direla lan egunetan, baina asialdia pasatzera edo beste edozein gauza kontsumitzera kanpora joaten direla.
Alderantzizko joera
Normalean holako kultura azoka ibiltarietan gertatzen dena izaten da aste egunetan herritar gutxiago hurbiltzen direla liburuak ikustera eta erostera. Kaleetan ere lagun gutxiago ikusten ohi dituzte saltzaileek aste egunetan. Asteburuetan eta jai egunetan izaten dute negoziorik handiena.
Ba Arrasaten alderantziz gertatzen omen da. Aste egunetan askoz ere lagun gehiago ibili dira azokan, asteburuetan baino. Aizpurua, Elkarreko arduradunaren esanetan, herri tristea bihurtzen da Arrasate asteburuetan. Hori orain gertatzen ari dena. Etorkizunera begira, berandu barik, Elkarrekoak uste du hori arazo bat izango dela Arrasaterako.
Salmenta onak
Hala ere, azokako saltzaileak pozik joan dira Arrasaten egindako salmentekin. Datorren urtean ere hemen izango direla esan dute. Euskaraz saldu dutenaren artean arrakasta izan dute Jon Maiak, Elkarreko bildumak, Bernardo Atxagak eta Paul Austerren Brooklin Erokeriak liburuak. Gazteleraz ere oso ondo saldu da Paul Austerren liburua. Horretaz gainera, Ruiz Zafónen "La sombra del viento", eta Toti Martinez de Lezearen eleberriak oso ondo saldu dira. Musikan Benito Lertxundik saldu du gehien. Bestalde, gazteek aprobetxatu dituzte bilduma batzuk rock musika merkeago erosteko. Azkenik, haurren esparruan Pirritx eta Porrotx izan dira izarrak.